Ruihtheih thila harsatna tawk leh mi chanhaite enkawlna tura Dawrpui Bial Kohhran-ten an din Agape Home din champha vawi 11-na pualin vawiin chawhnu dar 2:00PM khan anmahni hmun Durtlang-ah programme an hmang a, Chief Minister Pu Lal Thanhawla'n a hmanpui.

Thu sawiin Chief Minister chuan kan thenawma hnam tamtak chimrala an awm laia vawiin thlenga Mizote zuaha kan la awm hi Pathianin he ramah hian Chanchin Tha hril tura min ruat vang ni-a a pawm tlat thu a tarlang. Ruihhlo leh sualna chi hrang hrangin kristian state Mizoram min tibuai lutuk ta te hi zoram mipuite kan inenletna tur pawimawh tak a ni Pu Hawla chuan a ti. Khawvelah ropuina, lalna, hausaknate umin kan inhmang buai em em a, vanrama kan chhawm theih awmchhun erawh chu kan tu leh fate chauh an ni tiin Pu Hawla chuan vanrama hruai thleng ngei tura kan tu leh fate ngaihsaka an tan hun tam tawk hmang thin turin chhungkaw tinte a chah a ni.

Agape Home hi ni 27 July, 1991-khan din a ni a, Samaritan, Kolkata-te nen thawkhovin rawngbawltu mi 10 an awm mek a, tunah hian enkawl mek (client) 16 an nei a, a din tirh atanga vawiin thlenga an enkawl tawh zawng zawng zat chu mi 896 an ni. Agape Home hian MSACS-te nen tanghovin Bawngkawn-ah Drop-in Centre an enkawl tel bawk a ni.

Vawiin Rising Day Programme hmannaah hian Chief Minister hi a nupui Pi Lal Riliani bakah Parliamentary Secretary Pu Lal Thanzara, Dy.Speaker Pu John Rotluangliana, MLA Pu Lalthansanga leh Durtlang leh Leitana khawtlang hruaitute an tel a ni.