Vawiin khan District Agriculture Office, Conference Hall, Kolasib ah Agriculture Department hnuaia NLUP 2nd Phase-a WRC I leh WRC II beneficiaries te hnenah 3rd leh 4th Instalment tanpuina sum hlanna programme neih a ni a. NLUP semna programme hi MIFCO Chairman leh Kolasib bialtu MLA ni bawk Pu P.C. Zoram Sangliana'n a hmanpui a ni.
Pu P.C. Zoram Sangliana chuan NLUP chu mipui te huapzo programme anih thusawiin Sawrkar in ngaihtuahna thui tak leh ruahmanna felfai tak hmangin NLUP hi a duang chhuak a ni, a ti a. NLUP chu mirethei te chawikanna leh dawmkanna programme anih piah bakah tlangram loneih dan tihtlem kawngah te, tui hna kang siam that leh humhalh kawnga te, sik leh sa inthlak danglam venna kawngah te leh thlai tharchhuah tih punna kawngah te a tangkai leh that avangin UNO lam pawhin a rawn ngaihven a, chuvangin UNO leh Mizoram sawrkar chuan thawhhona thuthlung te ziakin, office te rawn dinin hma an la tan mek a ni a, a ti a. Hei hi NLUP thawhrah nia a ngaih thu a sawi. NLUP beneficiaries te chu tanpuina sum an dawn te chu dik taka hmang turin leh taima tak leh rinawm takin hna thawk turin a fuih a ni.
He hun hmanpuitu dang Kolasib DC Pu Jitender Yadav chuan Mizoram dinchhuah nan agro-based industry lama hmalak a pawimawh thusawiin Kolasib District a Oil Palm mill a awm hi District mipui tan malsawnna ala ni dawn chauh a tiin a bik takin oil palm chingtute chu nasa leh zawka NLUP tanpuina hmang tangkaia an tharchhuah tihpun kawnga hma la turin a fuih a ni.
Vawiina NLUP semna programme hi District Agriculture Officer Pu R. Lalnunzira'n a kaihruai a, Pu Lalengliana, Subject Matter Specialist (Agronomy) chuan tun thlenga Agriculture Department-in Kolasib District-a NLUP hmalakna te power point presentation hmangin a tarlang a ni.
Kolasib District-a Agriculture Department hnuaiah hian NLUP 2nd Phase-a Wet Rice Cultivation I (WRC- I) ah beneficiaries 191 an awm a, heng zingah mi 59 hnenah 4th instalment atan cheng 16,000 leh 3rd instalment pek kimna cheng 9000 avaiin cheng 25,000 theuhin pek a ni. He sum hi WRC-I atana ram siam zawlna atan hman emaw tui lakna kawng siamna atan hman tura pek a ni. Heng mi 59 bakah hian Turial Bial a mi 25 leh Serlui bial a mi 107 te bank account ah cheng 25,000 theuhin thunsak a ni bawk.
NLUP 2nd Phase-a Wet Rice Cultivation II (WRC- II) ah beneficiaries 115 an awm a, heng zingah mi 10 hnenah 4th instalment atan cheng 19,000 theuhin pek a ni a, a bak cheng 25,000 hi fund hmuh huna pek leh tur a ni. He sum hi Terrace siam belhna atan hman tura pek a ni. Heng mi 10 bakah hian Turial Bial a mi 104 leh Serlui bial a mi 1 te bank account ah cheng 19,000 theuhin thunsak a ni bawk.
WRC I leh WRC II bakah hian Kolasib District chhunga NLUP 2nd Phase ah mi 104 in Oil Palm thlangin mi 13 in Fu chin an tlang a, heng mite hnenah hian tanpuina ah dawn tur zawng zawng cheng nuai 1 theuh pek an ni tawh a ni.
Kolasib District a Agriculture Department-in NLUP hmalakna pali - WRC 1, WRC II, Oil Palm leh Sugarcane an neih ah te hian NLUP Ist Phase leh 4th Phase thleng hian beneficaries mi 1791 an nei a ni.
