October ni 2, 2015 atanga rampuma hman ‘Cleanliness Week’ chu nimin ni 9.10.2015 khan Saikuti Hall, Lunglei-ah a kharna inkhawm hman a ni a, UD&PA Director Pu Zorammuana chu Khuallian chan changin he hun hi a hmanpui.

Lunglei DC leh Chairman, Lunglei Town Level Swachh Bharat Mission (Urban) Cleanliness Committee ni bawk Pu Ashish Madahorao More, IAS chuan Faina Hapta kharna inkhawm chhimtu zawng zawngte lawmna thu sawiin Faina Hapta chhung zawnga sorkar hnathawk, tlawmngai pawl, khua hrang hrang, khawtlang leh mimal tin ten Lunglei District chhungah faina lamah kawng emaw talin hmalakna an nei theuh thei chu a fakawm hle a ni, a ti a. ‘Faina Hapta’ chhung hian rampumah mi zawng zawng, thalai leh tar an ni emaw, hausa leh rethei pawh nise, rilru khat puin phur takin faina kawngah kan penchhuak vek thin hi ‘festival’ chi khat ang a ni tawh hial a, ramchhunga cheng zawng zawngte inkara inpumkhatna a siam hial a ni, a ti. Khawchhung leh khawtlang vawn fainaah a bik takin khawpui (urban area) ah mihring cheng an tam a, bawlhhlawh pawh a tam thin a, chuvangin tanlak a ngai zual a. Ramchhungah faina kawngah State aiin UT-te an che tha zawk zel a; Chandigarh chuan khawpui fai ber ‘Cleanest City’ nihna a hauh a, Andaman & Nicobar Islands chuan tuipuikam fai ber an nei bawk a, Delhi-a Connaught Place chu bazar hmun fai ber nih a hauh bawk tih a tarlang a. Mizoramah pawh nasa lehzualin tan la ila, heng lawmman dawng thinte zingah kan tel ve thei ngei ang tiin Pu Ashish More chuan kalkhawmte a fuih.

UD&PA Director Pu Zorammuana chuan Swachh Bharat Mission hi nikum 2 October 2014 atanga hman tan a ni a, Mahatma Gandhi pianchampha 150-na 2 October 2019 chhunga hman tur niin hemi hun chhung hian rampumah ekin nei lote tan ekin sak leh bawlhhlawh sawngbawl dan mumal zawk neih theihna turin chak taka hmalak a ni mek tih a tarlang a. SBM hnuaiah hian In tinah bawlhhlawhbawm rawng inang lo, bawlhhlawh tawih thei leh thei lo dah hranna tur sorkarin a hung vek dawn a. Mizoramah pawh ekin neilo chhungkua tam tak la awm thu sawiin Pu Zorammuana chuan Aizawl-ah ekin nei lo chhungkua 278 chhinchhiah a ni tawh a, Lunglei District chhungah 3000 vel an awm bawk a, heng chhungkuate tan ekin sak sak nan NGO-te chu tha thawh ve tura sawm an ni a, anni nena tangrualin SBM chu hlawhtlinpui ngei kan beisei a ni, a ti. State Capital Fai zingah Mizoram chu 9-na a ni a, Municipal Area fai zingah Aizawl chu 39-na a ni bawk a, bawlhhlawh sawngbawlna hmun mumal kan neih hunah chuan 1-na kan hauh thei hial a rin thu a sawi bawk. SBM hnuaiah hian Grassroots Football Academy te nen inremna siamin an zirlaite jersey tur UD&PA-in a tum dawn a, Grassroots naupangte chuan kar khatah ni 1 tal khawpui chhung tifaiin an hnatlang thung ang, a ti. Khawpui cheithat leh tihchangtlun nana sorkar laipui ruahmanna pakhat ‘Atal Mission for Rejuvenation & Urbanisation Transformation’ (AMRUT) hnuaiah Aizawl chu thlan tawh a ni a, tunah hian Lungleipawh a mihring cheng nuai khat aiin tlem deuh mahse thlang ve turin sorkar laipui hnenah dil mek a nih thu a tarlang bawk. 

‘Faina Hapta’ hman chhunga hma la tha lawmman dawngte chu :

1. MJA Lunglei huaihawt ‘Extempore Speech’ : 1st - Zohlimpuii Chhakchhuak, HATIM; 2nd - Lalthansanga Fanai, Mizoram Polytehnic; 3rd - Vanlalrema, Govt JB College

2. Veng fai : 1st - Serkawn, 2nd - Sethlun, 3rd - Salem

3. Office fai : 1st - EE, PWD Roads; 2nd - EE, PHE WATSAN Division & Industries; 3rd - Minor Irrigation & SSA

4. Primary Schools : 1st - Zotlang Govt P/S; 2nd - Govt Model P/S; 3rd - Zotlang Govt P/S II

5. Middle Schools : 1st - Rahsi Veng M/S II; 2nd - Darphawka Memorial M/S; 3rd - Zotlang M/S

6. High Schools & above : 1st - Govt JB College; 2nd - Govt Theiriat H/S; 3rd - Govt H/S, Electric Veng

7. Best Photographer (Theme : Cleanliness) : 1st - Henry Lallianzuala; 2nd - Lalruatsanga; 3rd - Rohluzuala Renthlei.

‘Faina Hapta’ kharna inkhawm Lunglei DUDO Pu Albert Vanlalliantluanga kaihhruaiah President, Lunglei District VC Assn leh President, Sub Hqrs YMA, Lunglei te pawhin thu an sawi a. Lunglei khawchhunga faina lama kum 2012 atanga nasa taka lo thawk tawh Clean Lunglei Organisers ten Khuallian Pu Zorammuana leh DUDO Pu Albert Vanlalliantluanga te hnenah ‘Clean Lunglei’ tih chuanna t-shirt an hlan bawk a ni.