Vawiin khan Agriculture Department chuan Agriculture Conference Hall-ah Quarterly Review Meeting an nei.

He Quarterly Review Meeting hmanpuitu Lt. Col. Z.S. Zuala, Parliamentary Secretary Agriculture chuan Agriculture Department-in Quarterly Review a nei thin chu lawmawm a tiin hetiang buatsaih a ni thin chu Sorkar efficiency pholangtu tha tak a nih thu a sawi. Mizoram State kan vanneihzia sawiin India ram state thenkhatah fur ruahtui tlak that loh avanga loneituten harsatna nasa tak an tawh lai leh an beidawngin anmahni nunna hial an lak laia Mizoramin ruahtui tha tak kan nei chu loneitute tan malsawmna a ni a ti. Thal laia hman tur ruahtui khawlna tha tak siam erawh chu a pawimawhin loneitute tan an mamawh huna hman tur awm theih dan ngaihtuah chu a tha hlea a hriat thu a sawi.

Parliamentary Secretary chuan Agriculture hna hi Office chhung chauha thawh chi a ni lo angin Director leh Officer-ten field an tlawh thin chu tha a tih thu sawiin District hrang hrang hnathawh a hmuna enpui zel an ni thin chuan hma a sawn tir hle a ni a ti.Department Officer-te chu Sorkar kutke ber in ni a, hmasawnna tura hnathawh kawngah hotu lamten tihdan tur an lo kawhhmuh che u a nih pawhin Technocrats in nih ang ngeiin Department leh ram tana tha tur hretu in nih anga ngaihdante huai taka sawi chhuak thin turin Officer kalkhawmte a chah bawk.

Parliamentary Secretary chuan kan hmanraw neih hrang hrang te a ni lo lamah luanraltir mai lovin uluk takin veng zui ang u, taihmakna leh thawhrimna, inpekna tak tak nen loneitute khaichhuahna kawngah theihtawp chhuahin mahni hlawkna lam um lovin hna i thawk ang u tiin kalkhawmte a chah bawk.

Parliamentary Secretary chuan huai taka hna thawk thei turin corruption laka fihlim a pawimawhzia sawiin tun aia nasa lehzuala tan la turin Officer kalkhawmte a ngen zui bawk.

Pu Lalrammawia, Joint Secretary, Agriculture pawhin Agriculture Department-in hna a lo thawh nasatzia thu sawiin Officer chhuanawm tak tak kalkhawmten an thiamna a darhzau thei ang bera an lo hmang thin chu lawmawm a tih rualin Organized Service hnathawh dan kalphung te a sawi bawk.

He Review Meeting kaihruaitu Director Dr. C. Lalzarliana chuan Sorkar-in Agriculture Department a enkawlnaah lawmthu sawiin Officer-te an thiamna tak tak hmang thei tura a dah angin Department pawhin hma sawn phah hle a ni a ti.

Dr. C. Lalzarliana chuan Power Point hmangin Department-in Scheme hrang hrang, National Food Security Mission (NFSM), Oil Palm Development Programme (OPDP), NLUP, Custom Hiring System chungchangte chipchiar takin a entir a. Bukvannei-a Oil Palm Mill-ah Oil Palm Fresh Fruit Bunch Metric Ton 1543.627 her a nih tawh thu te tarlangin tun dinhmunah NLUP hnuaia activity hrang hrangah beneficiary, WRC-I ah chhungkaw 8,767, WRC-II ah chhungkaw 7,976, Oil Palm ah chhungkaw 2,290, Sugarcane-ah chhungkaw 878, a vaiin chhungkaw 19,911 an awm mek thu a tarlang bawk.

He Review Meeting-ah hian District Agriculture Officer leh anmahni tawimawtu Officer bakah Directorate-a Officer zawng zawngte an kal a ni.