Vawiin chawhma dar 10:30 khan DC Meeting Room-ah Pu Lawmkima MCS, Serchhip District NLUP Nodal Officer kaihhruainain Tuikum Cluster chhunga khaw thlanbik sawm-a khawtlang hruaitute chu NLUP leh RKVY hnuaia Captive Farming of Passion Fruit project atanga tanpuina dawngtu turte endikna neih a ni a, MIFCO lam atangin Pu Sangzuala, General Manager leh a hote an tel bawk.

He hunah hian Tuikum Cluster chhunga khaw thlan bik sawm, Baktawng Vengpui, Baktawng Tlangnuam, Chhingchhip, Chhingchhip Mualpui, Chhiahtlang, Hualtu, Hmuntha, Khawbel, Khûmtûng leh Phulmawi atangin VCP leh an secretary te kohkhawm an ni a, RKVY hnuai atanga Sapthei ching tura thlante leh NLUP dawng tawh leh dawng tura thlan tawhte endik a, dawngkawp an awm leh awm loh te enfiah a ni a, he hunah hian siam rem ngaite siam that nghal a ni.

Mizoram Horticulture Department hian Chhingchhip-a Food Processing Plant changtlûng tak hi behchhana hmangin, a chhehvel khaw mipuiten eizawnna hlawk leh ngelnghet an neih theih nan, Captive Farming of Passion Fruit Project chu RKVY hnuai atangin chhungkaw 612 tan an kalpui tan mek a, hei hi NLUP nena tandun tirin sûm pawh chhungkaw pakhat tan 1,20,000/ zel awm tura ruahman a ni a. He project hnuaia sapthei chingtute chuan RKVY atangin Rs. 50,000/- leh NLUP atangin Rs. 70,000/ zel an dawng dawn a ni. Hemi a nih avang hian NLUP lo dawng tawhte chu an tel ve a thiang tawh lova, NLUP dawng tura thlan tawhte tan pawh, dawng kawp loin, a engemaw zawk zawkah chauh an tel remtih a ni.

He huna thu sawitu Pu Sangzuala, MIFCO General Manager chuan Sapthei chin chu eizawnna tlak leh la hlawk deuh deuh tur a ni a ti a. Khawvel ram tam takin an chin hlawhtlin ve thleih theih loh, hralh kal leh to em em si sapthei hi, Mizoramah chuan a tha duh em em a ni tiin; a sawngbawlna leh phurhkhawmna lamah harsatna a awm lova, helai biala awmte tan chuan eizawnna tha leh innghahna tlak a la nih chhoh deuh deuh a rin thu a sawi bawk a ni.