Mizoram Excise & Narcotics Department (END), Anti-Narcotics Squad te chuan nimin (17th July, 2014) zan dar 6:30 khan Heroin (No.4) 31 grams, 500 mgs an man.

Mizoram Excise & Narcotics Department (END), Anti-Narcotics Squad te hian Heroin neitu Lalnunmawia (36) s/o Lalduhkima, Thuampui Veng, Aizawl inti chu a hmunah an man nghal a. Heroin te hi Hawng 2 a ni a, sahbawn bawm 2-ah dahin Tiau atanga Aizawl-a rawn lakthlak a tum mek laiin Seling bulah an lo mansak a ni.

Lalnunmawia hi Section 21(b) of the Narcotics Drugs & Psychotropic Substances Act, 1985 (NDPS Act) hmangin thubuai siamsak a ni a, Central Jail-ah dahluh nghal a ni.

Anti-Narcotics Squad te hian tun karah vek khan Silchar lam atanga rawn phurh chhoh, Myanmar lama pek tur, Pseudo-Ephedrine tablet 2,55,000 (Nuai hnih sing nga sang nga) an man bawk a. Hemi kaihhnawihah hian mi 6 chu thu zawhfiah tura hren mek an ni a, damdawi phurhna Car 2 pawh hren mek a ni.