Vawiin khan Agriculture Department (Crop Husbandry) chuan Agriculture Conference Hall-ah Pu H. Liansailova, Agriculture Minister hovin 2013-2014 1st Quarter Review Meeting an nei.

He hun hmanpuitu Agriculture Minister Pu H. Liansailova chuan Agriculture-a dinhmun ngialnghet neih loh chuan ramin hma a sawn tak tak theih loh thu te, hmasawnna hrang hrang hi Agriculture-a innghat tlat a nih thu sawiin hnam damna chu Agriculture ngialnghehnaah hian a awm a ni a ti. Minister chuan hmasawnna hi a bul tan chauh ni mah ila, a hlawhtlinna hmuh tur awm chho mek hi Department-a thawktute thawhrimna rah a nih thu sawiin hun kal tawhah policy hrang hrang lo awm tawh thin mah se tun tum anga road map nei thaa mumal taka kal a la awm ngai lo tiin thawktute inpekna, langtlang tak chung leh thahnemngai taka thawhnaah lawmthu sawi pahin hun lo kal leh zel turah pawh chhunzawm zel turin Officer-te a chah. Agriculture hmasawnna tura tan la zel tur leh hnam damna tura theihtawp chhuah zel turin kalkhawmte a chah bawk.

He Review Meeting hmanpuitu dang Pu K.S. Thanga, Parliamentary Secretary, Agriculture pawhin thu sawiin tun Sorkar kal mekah Agriculture Department-in a thawh hlawk thu sawiin Sorkar leh mipuite pawh Agriculture Department hmalaknaa an lawm hle thu a sawi. A sawi zelnaah Parliamentary Secretary chuan hmasawnna kal zelah Research Wing hman tangkai thu sawiin State hmasawnna, ram economy siam theitu chu Agriculture Department hi a ni a ti.

He hun kaihruaitu Pu Lalram Thanga, Principal Secretary, Agriculture chuan India ramin Food Security a ngaihpawimawh thu sawiin hemi atana ordinance a siam tawh thu a sawi bawk. Buhl eh bal thar chhuah a lo pun lehzual nan van ruahtui khawlna (Rain Water Harvesting) a pawimawh thu a sawi bawk. Result Framework Document pawimawhna leh Demonstration uar lehzuala kalpui tha a tih thu a sawi.

Director Dr. C. Lalzarliana’n Power Point hmangin Department hmalakna hrang hrang a tarlang a, hemi hnu hian officer kalkhawmte chu fuihin Agriculture Department hna hi a Pathian thu a, thawktute pawhin rinawm tak leh taima taka thawk tur te, Staff te nena thawhhona tha nei tur leh ACR ziak danah pawh dik tak leh huaisen taka ziak thin turin officer kalkhawmte a chah bawk.

Director chuan Mizoram hi Oil Palm chin chungchangah a lar hle tawh thu sawiin Central fak pawh a hlawh hle a, North East States dangah Oil Palm in hriat a la hlawh lo hi Central pawhin ngaipawimawhin hemi pual hian Shillong-ah ni 10.7.2013 hian meeting neih a nih tur thu a sawi bawk. He hunah hian Mizoram chu a hmalakna hrang hrang te entir tura beisei a nih thu a sawi bawk.

Tun dinhmunah Mizoramah Oil Palm 3,711 Ha. a zauah chhungkua 5,623 in an ching mek a, an thar chhuah Fresh Fruit Bunch pawh 2,133 MT hralh a ni tawh a. Oil Palm chin hi Sorkar Flagship Programme niin NLUP ah pawh Agriculture Department hnuaiah Trade pakhat a ni bawk. Oil Palm Mill hmasa ber tur Bukvannei, Kolasib District-a mi chu ni 15th October, 2013-a hawn hman turin Godrej Oil Palm Ltd. chuan chak takin hma an la mek a, he Oil Palm Mill bunna tur lungphum hi ni 15.9.2012 khan Chief Minister Pu Lal Thanhawla chuan a lo phum tawh a ni.

Lunglei District-ah pawh Oil Palm Mill bunna tur hmun 3F Company-in Rotlang-ah thlang fel tawhin a lungphum pawh ni 19.2.2013 khan Agriculture Minister Pu H. Liansailova chuan a lo phum tawh bawk a ni. Oil Palm Seed Garden hmun atan Directorate of Oil Palm Research chuan W. Serzawl a lo thlang fel tawh bawk a ni. He Quarterly Review Meeting-ah hian District Agriculture Officer ten an District theuha Department hmalakna hrang hrang te thlirho a ni a. 12th Plan chhunga hmalak dan tur te chhawp chhuak nghalin Scheme hrang hrangah Target te insiam fel nghal a ni. Meeting-ah hian National Food Security Mission leh RKVY hnuaia hna hrang hrang thawh dan tur te chipchiar taka sawiho a ni bawk. He Meeting-ah hian Department-in hmathlira a neih ber tur zingah buh leh bal tam zawk thar chhuak thei tura hmalak a thu kalkhawmte hriattir an ni bawk.

Agriculture Minister hova Quarterly Review Meeting neih hma hian Director of Agriculture (Crop Husbandry) hovin ni 5th & 6th July, 2013 khan Officer te hian thlirlawkna an lo nei tawh a. Vawiin Review Meeting neihah hian Mizoram Agriculture Service Officer 96 an tel a ni.