Mizoram Legislative Assembly Speaker Pu R Romawia chuan mipuiten sorkar hnen atanga dawn tur awm te kan beisei a thiang ang bawkin sorkar laka kan tih ve tur chhiah chawi te, vantlang thil uluk taka enkawl te leh kan tih tur sorkarin a tuk apiang rinawm taka hlenchhuah chu kan mawhphurhna a ni, a ti. He thu hi vawiina MHIP Day lawmna Durtlang North-a a hmanpui tuma a sawi a ni a. Khawtlangin chhiat an tawh avangin a ni tak, July ni 6-ah an hman ve theih tak loh avangin Durtlang North MHIP te chuan vawiin hian an veng Community Hall-ah MHIP Day vawi 39-na pualin Speaker Pu R Romawia hovin hun an hmang a ni.

Speaker chuan chhungkua a dinhmun pawimawh tak chelhtu nu te chu an ngaihhlut zawng, thil hlu leh hlu lo, thil tha leh thalo an tehna ah fimkhur turin a chah a. Sum leh pai ngah leh hausakna te hi nunmawi tel lo chuan a lo thlawn mai a ni a, ngaihhlut zawng teh nan Pathianin eng ang tehfung nge a hman tih ngaituah fo tula a hriat thu a sawi a ni. Hmeichhiate chu tuarchhel leh teirei peih an ni chawk a, kawng hrang hrangah mipa te tlukloh an tam ta hle tiin ram hruaitu ni tur pawhin hmeichhia an nih avanga hnual suat lova, a tling leh tlak an nih phawt chuan ram hruaitu tha tak tak an la chhuah zel a beisei thu Speaker hian a sawi bawk.

Durtlang North MHIP hruaitu nihna kum 10 aia rei lo chelh tawh Pi Vumchingi leh Pi Zafali te hnenah chawimawina thuziak Speaker hian a hlan a. An member kum 70 chunglam mi 29 te hnenah chawimawina thilpek a pe bawk.

MHIP Day lawmna programme, an President Pi P.C. Lalthangi kaihhruaiah hian dan hremi, Asst. Public Prosecutor Lalrinpuii’n India ramin hmeichhiate hamthatna leh humhimna dan hrang hrang a neihte chu kalkhawm te a zirtir a. Durtlang North YMA, MUP leh Local Council aiawh te pawhin thu an sawi a ni.