No.3712/2021-2022

Aizawl, the 18th January 2022 : Vawiin khan Agriculture Minister Pu C. Lalrinsanga, Agriculture Development Board Chairman ni bawk hovin Agriculture Development Board chu SAD Conference Hall, MINECO ah an thukhawm a. Meeting ah hian Sawrkar Flagship programme SEDP hnuaia Agriculture Department hmalakna tur – Vaimim leh Bekang chin chungchang sawiho a ni.

Pu C. Lalrinsanga chuan SEDP hmalakna thoin kum 2019-20 a vaimin chin chu a hlawhtling in tharchhuah a pung a, chuvangin vaimim chin hi la kalpui zel tha tiin vaimim leh bekang chin lamah SEDP hnuaia hma lak tum niin ruahmanna siam a nih thu a sawi a. Vaimim chingtu te thoin, an ram ngaiah vaimim an thar zawha, bekang an chin lehin lei hanna engemaw chen a siam thei leh a, chuvangin thlai pahnih hi relay cropping anga kalpui a ni dawn tiin a sawi. Beneficiary thlanna chungchang sawiin inkaihhruaina Planning Department in an chhuah chu Department in uluk takin a kalpui dawn a, a vilna monitoring pawh kan uluk hle dawn tiin a sawi.

Meeting ah hian Planning Department in ruahmanna an siam chu sawiho anih hnuin Board chuan SEDP hnuaia vaimim leh bekang chingtu chhungkaw zat tur chu 10000 ve ve nise tiin an rawt a. Loneitute hmakhua ngaiin leh lei hanna tha tur ngaituahin vaimim leh bekang ching hi chhungkua thuhmun nise tih a ni bawk a. Heng thlai te chi hnih te hi hlawhtling taka chin anih theih nan a chinna hmun tur pawh uluk taka thlan nise; inkaihhruaina pawh mumal taka siamin, Sawrkar flagship programme anih angin uluk leh fimkhur taka kalpui nise tiin rel a ni.

Meeting ah hian Agriculture Development Vice Chairman, Pu H. Biakzaua leh Agriculture Secretary Pu J. Hmingthanmawia leh Board Member dangte an tel a ni.

SEDP hnuaia hian heng thlai chi hnih chin nan Planning Department chuan vaibelchhe 71.50 an ruahman a ni.