No.4405/2021-2022

Aizawl Vau thla ni 25, 2022: Lawngtlai East Bialtu MLA, Agriculture Development Board Vice Chairman Pu H. Biakzaua chuan vawiin khan Lawngtlai District Village Council Association (LDVCA) silver jubilee lawmna hun, Lawngtlaia Central YLA Hall-a buatsaih chu Khuallian niin a hmanpui.

Pu H. Biakzaua chuan LDVCA te'n kum 25 tling a, silver jubilee an thleng thei chu lawmpuina a hlan a. Kum 25 chu vanglai inṭanna niin, hma huna kan nihphung tur a lang ruak tawh ṭhin tih sawiin, an silver jubilee kum chu hma lakna tur hrang hrang insawh nghehna leh bul ṭanna kuma hman tum turin LDVCA member-te chu a chah a ni.

VC chu ram hmasawnna tura rorelna bul inṭanna, mipui nen innghenga rorelna a nih avangin a pawimawh hle tih sawiin, Pu H. Biakzaua chuan khaw ṭhan dan tur leh mipuite hmasawnna tur te, khaw entawn tlak din tura mawhphurhna te chu VC kutah a innghat lian hle tih a sawi a. Khawtlang hmasawnna hna thawh a ni emaw, chhiat rupna thlen thulhah emaw khawtlang mipuiin an thlir ber chu khawtlang hruaitute an ni tih sawiin, mipuiin an rin ngam ang taka fimkhur tak leh rinawm taka hna thawk tur te, VC rorelna chu ngaih pawimawh deuh deuh a nih theih nana VC nihna chu zahawm taka vawng tur te'n VC member kal khawmte chu a chah a. LDVCA chu a theih chin chinah hma lakpui zel a tum tur thu sawiin, silver jubilee lawmna senso phuhruk nan ₹ 10,000/- (cheng sing khat) a hlan nghal a ni.

He huna khual zahawm, Lai Autonomous District Council (LADC)-a Local Administration Department changtu Executive Member Pu C. Rongura pawhin thu sawiin, VC te chu khawtlanga thuneihna sang tak chelhtu an nih angin, an thuneihna hmang sual lo tura fimkhur turin a chah a. Khawtlang hmasawnna ngaihtuaha office leh mi dang an dawrnaah incheina uluk tur te, khawtlang ṭhatna tura thawh hona ṭha vawng nung zel tur tea chahin, jubilee lawmna pualin ₹ 10,000/- (cheng sing khat) a hlan ve bawk.

LDVCA silver jubilee lawmna inkhawm hi President Pu V. Lalramnghaka'n a kaihruai a. LIKBK Vaṭhuampui bialtu pastor Rev. Ngurliantluanga Chinzah chuan hunserh hmangin, LDVCA General Secretary Pu Elvis Lalthangzuala'n report a pe a. LDVCA President hmasa ber Pu B. Lalhuma leh Central Young Lai Association (CYLA) General Secretary Pu Jh. Lalrindika te hnen aṭangin chibai bukna thu ngaihthlak a ni a. LDVCA hruaitu hluite chawimawina hun hman ni bawkin, LDVCA Secretary Pu Rohluzuala Chhakchhuak chuan lawm thu sawiin, hun khar a ni.

He hunah hian Khuallian ṭawiawmtu LADC-a MDC Pi C. Biakthansangi leh Pi Z. Ngunchhini te leh MNF party hruaitute, sawm bikte leh LDVCA member-te an kal khawm a ni.

Vawiin chawhnua LDVCA silver jubilee lawmna inkhawm hman hma hian, zing dar 10:00-ah Lawngtlai Electric Veng-a LDVCA rama silver jubilee lungphun chu LDVCA President Pu V. Lalramnghaka chuan a hawng a. Chawhma lamah CYLA Hall-ah special conference hmangin, "Lawngtlai District Village Council Association Office/Guest House chu kumin chhung ngeia sak ṭan ni se" tih te, "CADC area-a village council-te tlawh ni se" tih leh "LADC area chhunga village council hrang hrangte'n hna ṭha zawk an thawh theihna turin monitoring neih ni se" tih te relin, inkaihhruaina dan siam ṭhat a ni bawk.

LDVCA hi LADC hnuaia village council te inzawm khawmna pawl niin, kum 1997 March ni 25 khan din a ni a. Tunah hian member VC 104 (village council puitling 97 leh sub-village 7) an awm mek a ni.

Attachment

  • Loading attachment...