No.3741/2021-2022
Aizawl the 20th January 2022: Vawiin khan kum 2022-23 chhung a Krishi Vigyan Kendra, Kolasib District hmachhawp hrang hrang thlir lawkna hun, 14th Scientific Advisory Committee chuan KVK Training Hall, Kolasibah thutkhawmna an nei a. Pu Rohmingthanga Colney, Director, Agriculture Department chuan kaihruaiin KVK, Kolasib district hnuai a Horticulture, Soil Science, Animal Science leh Agro-Forestry-a hmachhawpte ngaihthlak a ni.

Hun kaihruaitu Pu Rohmingthanga Colney, Director, Agriculture Department chuan Kolasib district chu buh, thlai leh thei chin nana khawthleng rem leh leilung hausa tak a nih angin ei leh bar intodelhna kawnga thawktu Sawrkar department hrang hrangte tan lakna leh thawhhona a pawimawh thu a sawi a. Thawh that avanga chawimawina lo dawng tawh thin, KVK, Kolasib district hmalakna chu lawmawm a tih thu sawiin kuthnathawktute tih hmasawnna tur a zir bingna hrang hrang an kalpui thin te chu a hlawhtlinna tak hmu chhunzawm zel tur chuan lo, huan, ram neitute leh ran vulhtute hnen ah heng thiamnate hi kimchang taka an chhawr tangkai theih nan zirtirna pek a pawimawh thu a sawi. Agriculture Director chuan lo leh huan siamna hmunahte chuan a theih chin chin ah thlai pakhat aia tam, a rual a kal kawp (Integrated Farming) tur a inzirtirna pek chu uar chhoh zel a pawimawh thu a sawi bawk a ni.

Dr.Michelle C.Lallawmkimi, Senior Scientist & Head, KVK, Kolasib chuan kum 2021-22 chhung a hmalakna kalpui dan tlangpui tarlanna hun hmangin Horticulture, Soil Science, Plant Protection, Agro-Forestry leh Animal Science hnuai a zir bingna hlawm sawm (10) kalpui zing a pahnihte chu hlawhtling tak a zawh fel a nih thu leh a dangte pawh chhunzawm mek a nih thu a sawi.

Kum 2022-23 chhunga hmachhawpte hi Horticulture, Soil Science, Plant Protection leh Agro-Forestry hnuai ah thlai thlan chhuak bik te zir bingna ‘On Farm Trial’ hlawm 8 leh a hlawhtlinna mipui hnen a thlen theih nana hmalakna ‘Field Level Demonstration’ hlawm 8 kalpui dan tur te sawiho a ni a. Animal Science hnuai ah ran chaw (Oat variety Kent) enchhina te, hlawk zawk a Guinea Fowl vulh dan te leh vawk chi tha siam chhuah nana hmalak dan tur te a tel bawk a ni.

Vawiin Scientific Advisory Committee-ah hian Joint Director, ICAR, Distraict Agriculture Officer, District Horticulture Officer, District Veterinary Officer, District Project Manager, FOCUS, District Information & Public Relations Officer, Project Director, ATMA, President, AMFU leh President, MJA, Kolasibte an tel a. Agriculture Department-a Deputy Director-te an tel bawk a ni.