No.3742/2021-2022

Aizawl, 20th January, 2022 : Sawrkar Laipuia Ministry of Science & Technology in Mizoram tana a thlawna an pek Mobile I-Lab (Infectious Disease Diagnostic Laboratory) chu vawiin khan Chief Minister Pu Zoramthanga leh Union Minister of State for Science & Technology Pu Jitendra Singh ten internet kaltlangin an hawng. Chief Minister hian a pisa atangin a hawng a, Union Minister of State hian New Delhi atangin a rawn hawng thung a ni. Health Minister Dr R. lalthangliana pawh he hunah a tel a ni.

Chief Minister Pu Zoramthanga chuan Pu Jitendra Singh chu DoNER Minister a nih lai pawha Mizoram duhsaktu a nih thu sawiin, Science & Technology Minister a nih hnu thleng pawha Mizoram a ngai pawimawh thin chu a lawmawm takzet a ni, a ti a. Mizoram mipuite leh Mizoram sawrkar aiawhin Mobil I-Lab kan neih theihna tura hma min laksaktute zawng zawng chungah lawmthu a sawi a ni.

Chief Minister chuan Mizoram chu international boundary pahnih in a karcheh leh hmun kilkhawra awm a ni a, hripui leng pawh a rawn thleng tlai deuh hret niin a hriat a, India ram hmun danga a len nasat zualpui a reh hnuah min nuai ve leh a ni a, hripuiin kawng hrang hrangin na takin min nghawng a, sample testna khawlte kan mamawh nasat zual lai taka Ministry of Science & technology duhsakna kan dawng hi kan vannei hle a ni, a ti a. RT-PCR Laboratory pawh Aizawl leh Lungleiah kan neih thu sawiin district dangah pawh dah tumin ruahman a ni a, tun dinhmunah chuan mobile I-lab hian nasa takin min chhawk dawn a, hri do hneh ngei turin kan inpuahchah a, theihtawp chhuahin kan tang dawn a ni, a ti.

Union Minister of State for Science & Technology Pu Jitendra Singh chuan Mizoramin mobile I-lab an nei thei ta chu a lawmpui thu sawiin, hemi atana Chief Minister Pu Zoramthanga leh Health Minister Dr R. Lalthanglianate thahnemngaihnaleh hmalakan chu a zahawm takzet a ni, a ti a. India hmarchhak chu hmun kilkhawr leh inkalpawh zung zung harsatna hmun a nih avangin anni pawhin an ngai pawimawh tih sawiin, a bul tan nan Mizoram kan duhsak hmasa ber a ni, a ti a. India hmarchhak State te tan mobile I-Lab tam zawk ruahman chu an ngaih pawimawh berte zinga mi a nih thu a sawi. COVID-19 vanga hmanraw thar kan neihte hi kawng lehlamah chuan malsawmna a ni ve tho tih sawiin, Mobile I-lab chu COVID-19 a reh hnu pawhin tangkai taka hman chhunzawm zel theih tur a nih thu a sawi a ni.

Health Minister Dr R. Lalthangliana pawhin Mizoramin mobile I-Lab an nghahhlelh thu sawiin, Chief minister Pu Zoramthanga pawhin a ngai pawimawhin min tuipui bawk a, engkimah thurawn tha tak tak nen hma min hruai sak thin na avangin India hmarchhak State zinga a thlawna dawng hmasa ber kan ni thei a ni, a ti a. Hripui leng vangin harsatna kan tawk nasa a, kan hmanrua leh bungrua neih ten an tlin tawk tawk thin a chutih laia mobile I-Lab kan nei thei ta hi kan lawm takzet a, nasa takin min chhawk zangkhai ngei dawn a ni, a ti bawk. COVID-19 sample test chungchangah Mizoram chu kan ti tha hle tih sawiin State dang ten mihring awmzat atanga chhutin 22 % - 80% inkarah an awm hlawm a, hetih lai hian Mizoramah chuan sample nuai 15 chuang test tawh niin, mihring cheng zat atanga chhut chuan 114% lai a ni tawh a, hmun kilkhawr leh hla zawka cheng, sample test na hmun pan remchang lote pawh tunah chuan kan tlawhpawh thei tawh dawn a, tangkai taka hman kan tum a ni, a ti.

Mobile I-lab siamtu AMTZ (Andhra Pradesh MedTech Zone Ltd., Vishakapatnam Managing Director Dr J.K. Sharma chuan Chief minister Pu zoramthanga’n mobile I-lab a ngai pawimawh chu anmahni ti tang tu a nih thu sawiin lawmthu a hrilh a, AMTZ chuan medical equipment-ah India ram a intodelh theihnan theihtawp chhuahin tan an la mek tih sawiin, mobile I-lab chu natna inkaichhawn awlsam chin hrang hrang test theihna tura duan a ni a, RT-PCR sample bakah HIV, TB leh natna dang tam tak a test theih dawn avangin COVID-19 hripui a reh hnuah pawh kawng hrang hrangin a la tangkai dawn chauh a ni, a ti a. Hmun kilkhawr leh chengker zawka chengte tan a tangkai lehzual dawn a ti a, nikhatah RT-PCR sample 50 vel a test thei dawn tih a sawi bawk.