1977/2026-2027

Dated Aizawl, the 28th August 2026: Vawiin khan Agriculture & Farmers Welfare (A&FW) Department Minister Pu PC Vanlalruata’n Falkawn, Aizawl-ah Rashtriya Krishi Vikas Yojana - Detailed Project Report (RKVY-DPR) 2023-24 hnuaia sak “Edible Oil Processing Plant” a hawng a. Minister hovin khawl hnathawhdan enchhinna (trial run) hlawhtling taka neih a ni bawk.

Edible Oil Processing Plant hawnna inkhawm buatsaihah khuallian Pu PC Vanlalruata chuan Mizoram chhungah ngei oilseed herna tha tak neih a ni ta chu lawmawm a tih thu sawiin, changtlung taka a thanlen zel theihna turin duhsakna a hlan a. Sawrkar chuan farmer-te a ngaipawimawh a; sawhthing, nihawichi, behliang, antam leh chhawhchhi chinna lamah hma a la chho zel a, a hralhna tur market pawh sawrkarin a ngaihtuahpui zel a ni, a ti a. Farmer-te tan kawl a en zel thu sawiin, heng processing (sawngbawlna) industry hrang hrang rawn ding chho zel hian ram hmasawnna a la thlen zel tur thu a sawi a. Heng industry-te hi farmer-te tana innghahna tling eizawnna thlentu a nih ngei a beisei thu a sawi bawk.

Khuallian chuan farmer-ten hma an sawn zel theihna turin department pawhin RKVY scheme atangin theih ang anga kawng a zawnpui zel tur thu leh cooperative society-te parchhuah theihna tura hma a lakpui zel tur thu a sawi a. Sawrkarin sawhthing a buaipui mek pawh chu processing (sawngbawlna) lamah tan lak zel an tum thu sawiin, sawrkar chu farmer-te tan a inhawng reng a, anmahni chhawmdawla, an mamawhte phuhruksak zel chu sawrkar anga an tihtur a nih thu a sawi bawk. He huna lo tel ve Falkawn VC-te pawh chu an khuaa he plant bun a nih ang ngeiin a hmunhma venhim leh enkawl kawnga hma lakpuia, uap lum zel turin a sawm bawk a ni.

He processing plant bunna building hi RKVY-DPR scheme hnuaia FY 2021-22 sum hmanga sak a ni a, fencing hi FY 2022-23 sum hmanga sak leh niin, a tel (edible oil) herna khawl hi FY 2023-24 sum hmanga lei a ni bawk. He tel herna hmun (edible oil processing plant) ah hian thlai hriak nei chi reng reng chu her theih vek a ni a. Khawl hi Agriculture & Farmers’ Welfare Department chuan tender chhangtu Aizawl City Oilseed Growers and Processing Cooperative Society Ltd. chu enkawl tura thlangin, MoU kum nga (5) chhung daih tur chu vawiin khan a sign pui a ni.

He programme hi A&FW Secretary Pi Ramdinliani chuan a kaihruai a, A&FW Joint Director Pu Malsawmkima hnen atang technical report ngaihthlak a ni a. Aizawl City Oilseed Growers and Processing Cooperative Society Ltd. aiawhin Society Chairman Pu Lallawmkima chuan thu tawi sawiin, A&FW Director Pi Vanramthangi chuan lawmthu sawinain inkhawm hi a khar a ni. Mizoram sawrkar aiawhin A&FW Director Pi Vanramthangi leh Aizawl City Oilseeds Growers and Processing Cooperative Society Ltd. Aiawhin an Chairman Pu Lallawmkima ten MoU ah hian hming ziakin an nemnghet a ni.