1976/2026-2027

Saitual, the 28th August, 2026: Vawiin khan Govt. Saitual College Auditorium-ah, Saitual Joint Village Council buatsaihin Saitual chhul chhuak Rajya Sabha MP atana thlan tlin tak, Pu K. Laltluangkima chawimawi a ni a, he hun hi Prof. Lalnilawma, Minister, Tawi bialtu MLA ni bawk chuan a hmanpui.

He hunah hian Rajya Sabha MP Pu K. Laltluangkima chuan thu sawiin, Saitual mipuiten amah lawmpuina leh chawimawina hun tha siamsak a, thilpek tam tak an pek avangin lawmthu a sawi a. Rajya Sabha MP chuan Saituala piang a nih thu sawiin, a nu leh a pa te pawh Saituala piang leh seilian an ni, a ti a, Saitual chu a khaw ngainat leh sawi fo thin a nih thu a sawi bawk.

Pu K. Laltluangkima chuan Mizoram aiawh MP a nih dawn avangin a mawhphurhna a sang hle dawn tih a sawi a, Saitual mipuite chu tawngtaipui thin turin a ngen a ni. Rajya Sabha MP chuan beisei neih chu a thiang a ni, a ti a, chutih rualin a hlawhtlinna kawngah erawh hriatthiamna sang tak nei turin mipuite chu a ngen a, Saitual hmasawn zelna turin a duhsakna a hlan nghal a ni.

Bialtu Minister Prof. Lalnilawma pawhin thu sawiin, Pu K. Laltluangkima chuan Rajya Sabha MP-a thlan tlin ni turin harsatna tam tak a paltlang thu a sawi a, he chawimawina dawn hi a phu takzet a ni, a ti. Minister chuan Pu K. Laltluangkima chawimawina hun buatsaihtute chu fakawm a tih thu sawiin, inlawmpuina leh chawimawinaa duh tawk mai lo a tawngtainaa hre reng thin turin kalkhawmte chu a chah a ni.

8th June 2026-a Rajya Sabha MP atana ZPM candidate thlan tlin ni ta, Pu K. Laltluangkima hi Saitual chhul chhuak, kum 1965-a Saitual a piang, rambuai avang a Saitual chhuahsan ta a ni.

Vawiin hun hmanna hi Pu J. Thangzuala, VCP/ Chairman, Saitual Joint. VC chuan a kaihruai a, hunserh hi Rev. Laldinpuia Hranleh, PCI, Saitual Chhim Veng Bial in hmangin, thilpek leh pangpar hlanna hun hman a ni bawk. Thusawi hi Rajya Sabha MP Pu K. Laltluangkima leh Bialtu Minister Prof. Lalnilawma bakah hian Pu JK Dawngzuala, Chairman, ZOHANDCO leh sawm bikte hnen atangin ngaihthlak a ni a, Pu Vanlalmuana, VCM Saitual-I chuan lawmthu sawinain hun a khar a ni.