1975/2026-2027

Aizawl the 28th August, 2026:  School Education minister Dr. Vanlalthlana chuan vawiin khan School Education Complex Conference Hall, Zarkawtah Mizoram Education Inspecting Officers' Association (MEIOA) lehkhabu buatsaih 'Robâwm' tih chu a tlangzarh.

Lehkhabu tlangzarh inkhawmah hian khuallian Dr. Vanlalthlana chuan thu sawiin lehkhabu hlu tak 'Robâwm' tlangzarh a ni chu a lawmawm takzet a ni a ti a. Lehkhabu hming atan 'Robâwm' tih kan thlang ang ngei hian, he lehkhabu hi School Education Department leh zirna ngaihventu zawng zawngte tan ro hlu tak a nih ngei ka beisei a ti a. Mizorama zirna kal chhoh dante, a kalphungte, dan leh hraite leh tawnhriat pawimawh tak takte hi ziaka kan vawn ṭhat loh chuan a ral mai ṭhin a. School Education Department-a thawk mek leh lo la thawk zel turte tana hriatna tizau tur leh ruahmanna siam nana hman ṭangkai theih tura khawr pum a ni chu thil ropui tak niin ka hria a ti bawk.

Dr. Vanlalthlana chuan 'Mizoram Education Inspecting Officers' Association' tihah hian a laimu tak chu 'Inspecting' tih hi a ni a. Statehood kan kai hma chuan inspecting officer-te hi 'Sikul Kantu' tiin mawi takin kan ko ṭhin a. Rual u deuhte phei chuan 'Sikul Kantu pangngai an awm lai khan Mizoram zirna hi a ṭha zawk' an ti hial ṭhin a ti a. Tunlai khawvelah e-governance kan uar tawh a. Internet hmangin online-in hna tam tak kan thawk a, pisaa ṭhu chung pawhin school report chi hrang hrang hmuh zung zung tur a awm tawh a. Chutihrualin he digital khawvelah hian a hmun ngeia tlawh (physical inspection) hi a thlak theih ngai dawn lo tih kan hriat reng a ngai a ni a ti a. Administrative officer tih hmingin a ken tel ang ngei leh 'Sikul Kantu' hming mawi tak an put ṭhin ang ngeiin a hmun ngeia en dikna hna uar thar leh turin a chah bawk a ni.

Dr. Vanlalthlana chuan zirnaah tan lak a ngaih ziate sawiin, amah ngeiin a zirchianna atangin zirtirtu indaih loh avanga insem darh deuh a tul zia sawiin, hemi atan hian ruahmanna siam fel a ni tawh a, hmalak vat a nih tur thu leh zirtirtu indaihlohna chhawk zangkhai turin zirtirtu lak belh tura ruahmanna siam pawh peih fel tep a ni tawh thu sawi bawk.

Pi Angela Zothanpuii, School Education Director pawhin Mizoram Education Inspecting Officers' Association (MEIOA) ten lehkhabu rotling tur an chu lawmawm a tih thu leh, bu khat maia duh tawk lovin a bu dangte pawh buatsaih leh zel thei se a duh thu asawi bawk.

Vawiina lehkhabu 'Robâwm' tlangzarhna hun hi  Pu PC Lalngaizuala, President MEIOA in a kaihhruaia, Dr. VR Ralte, Editor, Robawm hnen atangin lehkhabu buatsaih dan  ngaihthlak a ni a, Pu R.Lalthanmawia, Deputy Director (Rtd) & Editor –in-Chief, Robawmin lehkhabu sawi zauna hun leh thlirletna hun a hmang bawk. He hunah hian Mizoram Education Inspecting Officers' Associations (MEIOA) member te an tel tha hle a ni.