1974/2026-2027

Lawngtlai, 28th August  2026 : Vawiin khan Lawngtlai District AIDS Prevention Control Committee (DAPCC) chuan an Chairman leh Bawrhsap nibawk  Pu Donny Lalruatsanga kaihhruaiin DC Conference Hall-ah thutkhawm an nei a. IEC Campaign 'India Fight against HIV/AIDS & STI' 3rd Phase-  kalpui dan tur sawiho a ni.

Pu Donny Lalruatsanga chuan DAPCC Member- te hnena lawmthu sawiin, HIV/AIDS do kawngah tha thlah lova thawk zel turin a sawm a. Mizorama HIV/AIDS vei an tam lutuk chu veiawm a tih thu tarlangin, Ruihhlo do kawngah harh thar a tul hle a ti. Ruihhloin chhungkua leh Khawtlang nun a nghawng dan ngaithuahin mimal, chhungkua, NGO, Kohhran leh Sawrkarin theihtawp chhuah thin mahse, chawl lova thawh zel a ngai a ti a. A bik takin mipuite zingah HIV/ AIDS chingchang inzirtirna uar zawka kalpui pawh a tul tak zet a ti. Bawrhsap chuan Nu naupai ten Damdawi In ngeia nau an neihna tura hmalakna 'Project Genesis' kalpui tura ruahmanna siam fel tawh a ni, a ti a. Lawngtlai District - ah inkalpawhna harsa viau thin mahse sawrkar hmalakna hrang hrangin hmun kilkhawr ber a thlen a tul tiin Bawrhsap chuan theihtawp chhuah a nih tur sawiin, department hrang hrang,VC,NGOs, MJA, Kohhran leh mipuite thawhpuiah a sawm nghal bawk.

Dr. Remlalnghaki, Dy. CMO leh Member Secretary, DAPCC chuan report tawi pekna neiin 'IEC Campaign 'India Fight against HIV/AIDS & STI' 3rd Phase kalpui dan tur sawizauna neiin kumin bikah khua - 25 thlanchhuah a ni, a ti. Heng khua thlanchhuahah hian 'Awareness Campaign' leh HIV Screening Test - te kalpui niin, School bikah 'Quiz Competition' kalpui a ni  ang a ti.  ASHA kaltlangin In tin tlawhchhuah a ni ang a, raipuar tan HIV leh Syphilis Test kalpui a ni ang a, District Hospital Lawngtlai leh Community Hospital, Chawngteah 'Health Camps' kalpui a ni bawk ang. IEC Campaign 3rd Phase kalpui tur hian Rs. 4,00, 000/- ruahman niin, hemi hnuaia hmalakna hrang hrangte mumal taka chhinchhiah a nih tur thu a tarlang a ni.

Dr. Lalmuanawma Jongte, Sr. CMO chuan Mizoram leh Lawngtlai District - a HIV/ AIDS dinhmun tlangpui leh a do na kawnga hmalakna hrang hrangte tarlanna a nei a. HIV/AIDS Do na kawng leh Project Genesis- tha taka kalpui turin department hrang hrangte thawhpuiah a sawm a ni.

Thutkhawmah hian Lawngtlai District - a IEC Campaign 'India Fight against HIV/AIDS & STI' 3rd Phase kalpui dan tur chungchang sawiho a ni a. Khua-  25 thlanchhuahte chu pawmin, tha taka Campaign - kalpui ni se an ti a. Sumdawnna lirthei khalhtute zingah 'HIV Screening Test' kalpui ni se, hemi atan hian Association hruaitute nen thawhhoa ruahmanna siam ni se an ti a. HIV /AIDS High Risk Group - zingah 'Awareness Campaign' leh Screening test - kalpui a pawimawh hle tih a ni a, hemi atan hian ruahmanna siam ni se an ti a.Injecting Drug User (IDU) ten mumal taka Counselling an dawn theih nan DRS (CYLA) te nen thawhho ni se an ti bawk a ni. HIV/AIDS vei mek ten tha zawka 'ART Treatment' leh 'Counselling' an hmuh theihna tura hmalak ni se; hlawhtling zawka HIV/ AIDS leh STI - do turin mimal, chhungkua, NGOs, Kohhran, chanchinbu mi leh mipuite nen thawhhona tha zawk siam zel ni se an ti bawk a ni.

Vawiin DAPCC thutkhawmah hian Member- te an tel kim tha hle a, Pu Donny Lalruatsanga chuan lawmthu sawiin hun a khar.