1978/2026-2027

Dated Champhai, the 28th August, 2026: Vawiin khan Champhai District Executive Force buatsaihin DIG (Eastern Range) hnuaia Champhai District chhunga Ruihlo dona kawnga Police thawk ṭhate chawimawina hun chu Champhai Vengsang YMA Hall-ah hman a ni a. DIG (ER) Pu C. Lalnunmawia, Champhai DC Pu Mohammad Aaquib leh Champhai SP, Pu Gavit Gogna te chuan an hmanpui.

DIG (Eastern Range) Pu C. Lalnunmawia chuan kalkhawmnaah hian thu a sawi a. Hetiang ang hun hman a ni thei hi lawmawm a tiin, chawimawi tur an awm zel a beisei thu a sawi bawk. Eastern Range-in a hna an thawh chu ropui a ti hle a, chawimawina dawngtute pawhin an phu tak zet a tih thu a sawi bawk a ni. Zirlai sawm bikte pawh Drug-free generation siam theitu an nih thu hrilhin, kut tling lova sum lâkluh hmanga lan ropuina awt ngai lo tur leh, rinawm taka mahni thawhchhuah ngaihlu zawk turin a fuih a ni.

Deputy Commissioner, Champhai District pawhin thu a sawi a, Police Department hmalakna leh hnathawh chu a ropui a ti tak zet a. Champhaiah ngei pawh ruihhlo tam tak man a nih ṭhin thu leh, hmabak tam tak a la awm thu a sawi a, tha thlah lo a theihtawp chhuah chhunzawm zel turin thawktute a sawm nghal bawk a ni. Superintendent of Police Champhai District pawhin chawimawina dawngtute chu an phu a tih thu a sawi a, an thawhrimna mipuite pawhin hriatpui a, an theihna apianga police-te chu lo thawhpui ṭhin turin a sawm bawk a ni.

Sawm bikte hnen atangin thusawi ngaihthlak bawk niin, Champhai SDPO, Pu Alan Hmangaihsanga'n lawmthu sawiin hun a khar a ni.

Eastern Range chhunga Ruihhlo donaa thawk ṭha chawimawite chu hengte hi an ni :

I. ND&PS Case Investigation

1. SI. C. Lalsangliana (Champhai DEF)

2. SI. C. Biakthianghlima (Khawzawl DEF)

II. ND&PS Detection & Seizure

1. ASI Jonathan Lalbiakkima (Champhai DEF)

2. ASI H. Lalpekhlua (Saitual DEF)

3. ASI Lalneihsanga (Khawzawl DEF)

III. ND&PS Detection (Other Ranks)

1. CUB/17107 Romel Hruaisangliana (Champhai DEF)

2. CAB/16006 Zorama, 2nd IR Bn. Attached to Champhai DEF

3. CUB/20143 Samuel Ngurthanzuala (Saitual DEF)

4. CUB/19520 T. Lalhruaitluanga ( Saitual DEF)

5. D/G-II Lalremsanga (Saitual DEF)

Kumin (2026) chhunga Eastern Range-a ruihhlo man zat leh an hlut zawng chu a hnuaia mi ang hian a ni :

Heroin: 29.45306 kg — Rs. 58,90,61,200/-

Meth: 306.304 kg — Rs. 2,45,04,32,000/-

Crystal Meth: 10.259 kg — Rs. 30,77,70,000/-

Alprazolam: 30 grams — Rs. 2,40,000/-

Ganja: 10.159 kg — Rs. 5,07,950/-

Morphine: 22.286 kg — Rs. 22,28,60,000/-

Opium Fluid: 108.475 kg — Rs. 5,42,37,500/