3870/2024-2025

Saitual, the 17th January, 2025: Vawiin tlai dar 4:00 pm khan Agriculture & Farmers Welfare leh Horticulture Department changtu Special Secretary Pi Ramdinliani leh Dr. David Fangzauva, Deputy Managing Director, Mizoram Agriculture Marketing Board (MAMB) hovin District Agricultural Marketing Committee Saitual District an thu khawm a, District Bawrhsap Dr. Lalngura Tlau chuan he thutkhawm hi a kaihruai.

He hunah hian Agriculture Secretary Pi Ramdinliani chuan  Saitual district chu tawnhriat nei tha district a nih angin a thlamuanthlak a tih thu a sawi a, district entawntlak tak a ni, a ti. Pi Ramdinliani chuan Mizoram Sawrkarah Agriculture marketing in bung thar a kai a ni, a ti a, Saitual chuan Primary Agriculture Credit Society an nei tha hle a ni, a ti. Sawrkarin heng society te hi chhawr tangkai a tum thu a sawi bawk. Pi Ramdinliani chuan District tinin thlai chin bik neih chu a pawimawh thu sawiin, hei hian thlai thar that kawngah a puih a rin thu a sawi bawk. Secretary chuan society hruaitute chu inhawng taka an ngaihdan te sawi turin a ngen a, sawisel ngai a awm a nih chuan sawisel hreh lo turin leh thlai ching tute tana hma la zel turin a chah a ni.

He thutkhawmah hian DAMC te inpuahchahna leh hmalakna te, training an neih tawh dan te ngaihthlak a ni a, society hruaitute nen zawhna leh chhanna hun hlawkthlak tak neih a ni bawk.

He thutkhawmah hian Pi Ramdinliani, Secretary, Agriculture & Farmers Welfare Horticulture Department, Dr. David Fangzauva, Deputy Managing Director, MAMB, Saitual Bawrhsap Dr. Lalngura Tlau, DAMC member te leh line department hotute an tel a ni.