3871/2024-2025

Champhai, 18th January 2025: Vawiin khan Tlangsamahah Hub for Empowerment of Women, Women & Child Development, Champhai District hmalaknain  "National Girl Child Day-2025" lawmna leh “Beti Bachao Beti Padhao”  kum 10 tlin puala hun hman a ni a. National Girl Child Day thupuiah hian ‘Empowering girls for a bright future’ hman a ni.

He hun hi Pi K Lalrinfimi, District Mission Coordinator in kaihruaiin Presbyterian English School Tlangsam zirlai, Kristian Thalai Pawl Tlangsam branch leh DPO Official-te chuan  hmeichhe naupang te an lo him zel theihna turin kawng an zawh a, hmeichhe naupangte venhimna lam hawi thuziak te an pho lang a ni. 

National Girl Child Day hi hmeichhe zirna chungchanga hriatna thehdarh leh hmeichhe naupang ten an theihna kawng an hriatfiah theihna hun remchang siam sak nana hman ṭhin a ni a. Hei bakah hian hmeichhiate dikna chanvo humhalh leh zirtirna atan te, hriselna leh ei leh in ṭha an dawn theihna atan te, mipa leh hmeichhe inkara tharum thawhna dona atan leh naupang inneihna laka humhalhna pholanna atan hman ṭhin a ni.

Beti Bachao Beti Padhao (BBBP) hi India sawrkar scheme a ni a, "Hmeichhe naupang venghim la, zirtirna tha pe rawh" tihna a ni. He scheme hi kum 2015 aṭanga hman ṭan a ni a. Mipa leh hmeichhia inthliarna dona kawnga hmalakna atan te,  hmeichhiate tihchaka tihhmasawn nan leh hmeichhe fa pum chhunga an awm lai leh an pianhlima tihhlum ṭhin dona tura duan a ni.