3869/2024-2025

Khawzawl, dated 17th January 2025: Vawiin khan Khawzawl District Agriculture Marketing Committee (DAMC) chu Pi Ramdinliani, Special Secretary, Agriculture & Farmers' Welfare/Horticulture leh Director, Agriculture & Farmers' Welfare ni bawk hovin DC Meeting Hall-ah an thukhawm.

Secretary Pi Ramdinliani chuan Agriculture Department chu Mizoram a Department upa ber pawl a nihna angin a din tan atanga tun thlengin eng hmasawnnate nge a lo hmuh tawh tih chu ngaihtuah a tul a ni, a ti a. Agriculture Department chuan kuthnathawktuten an thawhhlawh an hmu ngei em, tih venpui chu a tih makmawh a nih thu a sawi.

Vawiin meeting-ah hian Mizoram chhung a priority crops pali (4) kan neih - sawhthing, aieng, hmarcha leh hmunphiah te District level a lakkhawm a hralh chhuahdan tur sawi ho a ni a, heng priority crops-te lakkhawm a hralh chhuahna hmun tur Secondary collection center-te spot verification neihdan tur leh Secondary collection center a January thla chhung a training neihdan turte sawi ho a ni. District Agriculture Marketing Committee report ngaihthlak a ni bawk.

Vawiin meetingah hian Khawzawl DC Pu K. Vanlalthiana, Addl DC. Pu Lalfakzuala te bakah Khawzawl District a Agriculture department lam hotute an tel a ni.