Vawiin khan Agriculture Minister Pu C.Lalrinsanga hovin Agriculture Department-a thawk Officer te chu Directorate of Agriculture Committee Room, Aizawl-ah an inhmukhawm a. Pi Lalhrangliani, Additional Secretary Agriculture Department kaihhruai meeting-ah hian Agriculture Secretariat, Crop Husbandry leh Research & Extension-a thawk Officer te an kal tha hle.

Agriculture Minister, Pu C.Lalrinsanga chuan Agriculture Officer te inpekna leh thawhrimna te avangin lawmthu a sawi a. Loneituten tam zawk an thar a, kan ram mipuite mamawh khawp kan ram chhungah ngei thar chhuah a nih theih nan theihtawp chhuah zel turin Agriculture Officer kalkhawmte chu a sawm a ni. Minister chuan Sorkarin Agriculture Development Board a din fel tawh thu leh, ‘Chaw’-a intodelh chu an tum leh ngaih pawimawh ber nih thu te,  Ei leh bara kan intodelh theih nan chak taka hma lak tum a nih thu te a sawi a. Khawvel zau zawk thlirin Chemical Fertilizer aia Organic fertilizer hman uar zawk tum a nih thu a sawi. Thalai tam takin kuthnathawh an hreh loh theih nan Farm mechanization uar a, khawl tha hmanga buh leh bal tam zawk thar chhuak tura hma lak a nih dawn thu Agriculture Minister chuan a sawi a. Buh leh bal thar tam nana tui a pawimawh avangin  Irrigation Department nen inpawh taka thawhho a tul a ni, a ti.  Buh leh bala kan intodelh theih nan cropping pattern thar hman a ngaih dawn thu leh Scheme thenkhat converge a ngaih tur thu  Pu C.Lalrinsanga chuan a sawi a. Buh bikah WRC- I leh WRC-II hnuaia command area development leh leilet atana hmun siam rem tawh, hman tangkai loh a rauhsan mai mai a lo awm te chu siamthat a, cropping pattern mumal tak neia kalpui a nih tur thu Agriculture Minister chuan a sawi bawk.

Pu C.Lalrinsanga chuan tun atanga rei lo te ah hian Pradhan Mantri Maan Dhan Yojana (PMMDY) chu Mizoramah hman theih an in beisei thu a sawi a. He scheme hnuaiah hian loneitu kum 18 atanga kum 40 inkar te tan pension tha tak pek a ni dawn a. Loneituten kum upat lam an pan hnua tuamhlawm an nih ve theih nan he pension scheme hi hman tangkai a ni dawn a. Hemi atan hian farmer census leh farm land record mumal tak neih chho a ni ang a, a phu leh mamawhtu dik takin he scheme hi an hman tangkai theih tura hmalakna kalpui a nih thuai tur thu Agriculture Minister chuan a sawi. Tunlai thiamna hmanga inthlunzawm tul a tih thu sawiin Minister chuan internet hmanga Directorate Office, District Office te leh loneitute inthlunzawmna buatsaiha harsatna inhriatpui leh inpuihtawn zung zung theih nan internet linkage siama portal tha tak nei tura hmalak a nih tur thu a sawi bawk.

Dr.H.Saithantluanga, Director, Agriculture Research & Extension chuan an hmalakna tlangpui leh hmachhawp te a sawi a. Agriculture Research & Extension Directorate hian Hnahthial-a Basic Agriculture Technology zirna Integrated Training Centre te, Neihbawih-a State Pesticide Testing Laboratory te, Chemphaia Agriculture Demonstration Farm te, District tina KVK, ATMA, SAMETI leh MOVCD te a enkawl bakah Research & Extension hna lam te a buaipui reng a. March thla khan Bean chi thar “Zorin Bean” chu siam chhuah a ni a, tunah hian Vaimim chi thar 7 siam chhuak turin hma lak mek a ni bawk , a ti.

Pu Rohmingthanga Colney, Agriculture Crop Husbandry Director pawhin an hmalakna tlangpui a sawi a. A taka Crop Insurance kalpui vat tum a nih thu te, District thar pathuma DAO Office hawn a nih thuai theih nana hmalak mek a nih thu te a sawi a. Agriculture Department-in Central Scheme a enkawl  te chu Direct Benefit Transfer mode leh Cluster-a kalpui ngai a nih avangin tih mai mai a rem lo va, cluster thlan bik chhunga mi, a phu te chauhin hamthatna an dawn theih nan fimkhur taka kalpui a ngaih thu a sawi a. Fall Armyworm-in loneitute Vaimim chin a khawihchhe viau dawna a lan laiin thawhhona tha tak hnuaiah thawktute thawhrimna avang leh Agriculture Minister Pu C. Lalrinsanga thahnemngaihna nasa tak avangin chhiatna nasa a thleng lo chu lawmawm a tih thu a sawi a, FAW hi la rawn lang zel thei a nih avangin inring renga awm a tul a ti bawk.

District Agriculture Officer ten an District huam chhung theuha an hnathawh dan leh hmachhawp te he meeting-ah hian sawiin inkawmhona hun tha tak hman a ni a. Aarhar dal  thar dan leh chhawhchi tel her theih tura hmalakna  te pawh Agriculture Officer te hian an report bawk a ni.