Vawiin khan Agriculture Minister Pu C.Lalrinsanga pisa ah Agriculture Growth Centre sak tur ruahmanna awm sa thlirho a ni a, Agriculture Department Director Pu Rohmingthanga Colney leh Agriculture Department Engineer te telin North-East Consultancy Services (NECS) Architect ten Agriculture Growth Centre sak dan tur a lem nen entirin an hrilhfiah a ni.

Agriculture Growth Centre hi NEDP sum Rs. Vaibelchhe 45.55 a sak tur a ni a, a sa tur hian North-East Consultancy Services (NECS) thlan niin Mizoram sawrkarin Rs vaibelchhe 20.55 Agriculture Department kutah hian a hlan tawh a ni. Tunah hian sak phalna Aizawl Municipal Corporation hnenah dil mek a ni a,phalna hmuh anih veleh kutthlak tan thei tura inpeihfel ani tawh a ni.

Agriculture Growth Centre hi tuna Agriculture Department Directorate building Tuikual South ami hi thiah a a hmunah hian sak tur a ni a, sak anih chhunga Directorate in office atana an lo luah lailawk tur pawh hmuh fel tawh niih Sawrkarin luah phalna a pe tawh bawk a ni.

Agriculture Growth Centre hi mizopa chhiara chhawng ruk a sang anih bakah basement pali a awm bawk dawn a, a pumpuia a building zau zawng hi 12458.03 sq.m ani ang. Agriculture Directorate office bakah Exhibition Hall pahnih, Food Court, Thlai thar zawrhna Agriculture market, Motor parking four wheeler 140 leh two-wheeler 110 dah theihna te a awm dawn a, Cold Storage, Conference Hall bakah passenger leh Car lift system dah ani bawk ang.

Agriculture Growth Centre hi sak tan anih atanga kum thum chhunga sak zawh tura ruahman ani bawk.