3614/2023-2024

Aizawl, the 1st February, 2024: Vawiin khan Agriculture Department chuan Directorate of Agriculture Conference Hall, Tuikual South-ah Department kaltlanga hmalakna hrang hrangte thlirletna leh hmalak zel dan tur kawnga chipchiar taka inrawnkhawma, Agriculture Minister Pu P.C. Vanlalruata hovin an nei.

Khuallian Agriculture Minister Pu P.C. Vanlalruata chuan Department hmalak dan thlirletna leh hmachhawpte sawihona hun chu a khat tawka neih a duh thu sawiin, sawrkar au hla leh ngaihpawimawh berte zinga mi Agriculture tihhmasawn kawngah theihtawp chhuahho a ngai dawn a, hemi tur hian loneitute thahnemngai taka kan thawhpui a ngai a ni, a ti a. Agriculture chu mipui tam zawkte eizawnna a nih thu leh tihhmasawn kawnga ngaihtuahna sen tlan a tul thu sawiin, kalkhawmte chu Agriculture dinhmun thlak danglam theitute an nih thu hrilhin, ram tana neitu thinlung pua hna thawk turin a fuih a. Agriculture sector chu ram sum leh pai siam danglama chawisang theitu lian ber a nih avangin ram hmasawn ni turin Agriculture chawikan hmasak hmanga bultan a ngai a, hemi hnu hian sector dangte pawhin hma a rawn sawn ve zel dawn a ni, a ti bawk.

Agriculture Minister chuan Agriculture chu kum tam tak chhung thar tam lam tinzawn (production based) ringawta a kal thu sawiin, tunah chuan thar chhuahte hralhna lam tinzawn (market based) hmanga kalpui tum a nih thu leh 'Market First' ti a kal chu a hun tawh takzet thu a sawi a. Sawrkarin a hralhna tur lam ngaipawimawhin Sawhthing, Aieng, Hmarcha leh Hmunphiah hralhna tur sum a dah thu leh rate mumal tak a duan thu sawiin, nakum budget pharh hma ngeiin buhfai rate pawh siama loneitute tana puanzar hman tum a ni a, Tung pawh sawrkarin a ngaih pawimawh dawn thu a sawi a. Tun hnaiah sawrkar laipui hotute Agriculture tihhmasawn nana dawr a nih thu sawiin, buh leh thlai tam zawk thar theihna hmun potential area cheibawl bakah farm mechanisation ngaih pawimawh tum a nih thu a sawi bawk.

Pu P.C. Vanlalruata chuan loneitute hriat chian a tul thu leh a luhrum atangin ang khata thuai mai a rem loh thu sawiin, awmze nei zawka hmalak a nih theih nan Digital Agriculture Mission hmanga hmalak ngaih pawimawh a nih tur thu a sawi a. Sawrkar tharin mimal ni lovin Society behchhana hmalak a ngaih pawimawh thu pawh sawiin, hemi tur hian Line Department dangte nena thawhho dan tur ngaihtuah tlan a tul dawn a ni, a ti a. Sustainable Agriculture tihhmasawn leh ngaihpawimawh tum a nih thu leh compact area-ah awmze nei zawka hmalak tum a nih thu sawiin, sum siam nana hmun hrang hranga hmalak aiin hlawhtling ngei turin hmasawnna ruhrel neihte tang tlang thei tura tanlak tum a ni, a ti a. A nihna ang tur taka sawrkar sum hman leh scheme kalpui a tul thu sawiin, rilru leh ngaihtuahna seng tlang turin kalkhawmte a chah a. Agriculture Department hotu kalkhawmte chu ram innghahna lungphum leh Agriculture dinhmun thlak danglam theitu an ni tih hria a, ram hmasawnna tura thahnemngai taka thawhpuiah a sawm nghal bawk.

Vawiin Agriculture Department hnuaia Officer-te puala hmalak dan thlirletna leh inrawnkhawmna hun kaihruaitu Agriculture Secretary Dr. H. Lianzela chuan buh leh thlai thar chhuah ti pung turin loneitute hnenah kan let leh a ngai a ni, a ti a. Technology thar, zirbingna, soil quality tih that leh land holding siam that, tuilakna leh inrelbawlna siam that, Agriculture infrastructure tihchangtlun, Agriculture Credit leh Crop Insurance tih chak leh buh leh thlai thar chhuah hralhna tur Market dap kawnga tanlakte chu hmasawn zel tura ngaih pawimawh hmasaka neih a tul thu a sawi a. Ei leh bar hlut zia leh a tel lova kan awm theih loh zia inzirtir thar leh a ngai a, hemi tur hian chuktuah huan atanga bultan thar a ngai a ni, a ti bawk.

Sawrkar thar ngaih pawimawh zingah Agriculture dah a ni chu Department tana thu lawmawm leh phurawm a nih thu sawiin, hei hi Green Revolution thlen tura hun remchang a ni tih hria a, ram awl tam takte a nihna tur ang taka hmanga intodelh tuma tanlak a tul thu a sawi a. Department hnuaia thawktute chu khawvel hmasawn zelin a kentel thiamna thar ber berte hmang tangkai thei tura inher rem thiam turin a fuih a. Mawhphurhna la ngam leh mamawh chhanna, remhria, a taka thawktu leh thawh chhan loneitute dah pawimawh hmasak bera nei mi nih tum turin a chah bawk.

He hunah hian Agriculture Director Pu Vanlalthlamuana'n PowerPoint presentation hmangin Agriculture Department dinhmun leh hmalakna tlangpui a sawifiah a. Kum 2023-2024 chhunga DAO, FOCUS, Civil Works, MOVCD, SAS Hnahthial, SAMETI, ATMA, Green Ag, KVK, Oil Palm Seed Garden leh PM Kisan hnuaia hmalakna tlangpui mawhphurtu Officer-te hnen atanga ngaihthlak a ni a. KY & RKVY hnuaia kum 2023-2024 chhunga Annual Action Plan (AAP & DPR based) leh senso (Expenditure) ngai zatte thlirho niin, zirhona atangin kum 2024-2025 atana Annual Action Plan duan dan tur leh senso ngai tur zat chungchangte ngaihtuahho a ni bawk.

Heng bakah hian Scheme hrang hrang kaltlanga awmze nei zawka thawhhona siam dan tur te, Agriculture Marketing, tun dinhmuna buh leh thlai thar chhuah dan leh hmasawn ngaihna lai te, Collective Farming tihhmasawn te, hmasawnna ruhrel pawimawh leh mamawh te, Farm mechanisation te, Scheme hrang hrang hnuaia hamthatna dawng tur thlan dan chungchang te, Fu chinna tihzauh chungchang te, Rabi Season (2024-25) chhunga buhseng tawhna hmuna Oilseeds chin chawilar te, Crop Insurance kalpui bakah inrelbawlna kawnga pawimawhte sawiho niin inrawnkhawmna hun hlawkthlak tak hman a ni.