3615/2023-2024

Aizawl the 1^st February, 2024 : Vawiin khan School Education Minister Dr Vanlalthlana hovin School Education Directorate Conference Hall-ah Vidyanjali scheme kalhmang zirhona neih a ni. Vidyanjali hi Ministry hnuaia Samagra Shiksha hmalakna pakhat a ni a, School-a thawk ni loten pawn lam ațanga school an puihna tura duan a ni.

He zirhona hunah hian School Education Minister Dr Vanlalthlana chuan thusawiin zirna sikul atana mipui chettirna tur Vidyanjali scheme a awm chu țha a tih thu a sawi a, amah ngei pawhin a bialchhung school-te tana țanpuina a pek dan te leh vengchhung mipuite chetdan a sawi. Vidyanjali scheme hnuaiah hian mipuiten tha an thawh theih dan inhrilhhriat a, he scheme hi a hlutna leh pawimawhna kan hriat tlan ngai a tih thu a sawi. School tana mahni remchan dan ang anga tha thawh emaw țanpuina pete chu lawmthu sawi nan ngaihhlutna certificate pek te pawh țha a tih thu a sawi.

School Education Secretary Dr. Lalzirmawia Chhangte pawhin thusawiin mipuiin neitu nihna thinlung an put leh tha an thawh hi central sorkar hian a duh a. Tun hmain khawtlangin sikul an din a, building an sa a, zirtirtu an ruai a, neitu an ni hliah hliah a, tunah pawh hian mipuiin mahni theihna ang anga tha leh bungrua kan pek zel theih chuan mipuiin zirna hi an ta neih leh zual ang a, zirnain a țhatpui dawn a ni a ti.

Vawiina zirhona Pu Lalhmachhuana SPD Samagra Shiksha kaihhruaiah hian Pu Zionparlawma, Dy. SPD, Samagra Shiksha chuan Vidhyanjali awmzia leh kalpui dan a sawifiah a. Tun dinhmunah hian Vidhyanjali hnuai Govt leh Aided school 2855 awmah 2678 an inziak lut tawh a, zaa 93.80 an tling a, school tanpui tura inziak lut 759 an awm tawh a, bungrua chi hrang 917 pek a ni tawh a, tha thawh pawh 255 a awm tawh tih a sawi. Vidhyanjali hmang hian tha leh bungrua eng pawh sikul tana țangkai tur hmangin țanpuina pek theih a ni a, suma pek erawh chu a huam lo.

Vidyanjali zirhona hunah hian School Education Directorate Officer te leh Samagra Shiksha SPO officer te an kalkhawm a ni.