2321/2026-2027\

Dated Aizawl, the 23 September 2026: Vawiin khan Agriculture & Farmers’ Welfare Department changtu Minister Pu P.C. Vanlalruata hovin A&FW Conference Hall, Tuikualah, Agriculture Department leh Mizoram Milk Producers' Cooperative Union Limited (MULCO Ltd.) te chuan Natural Farming nasa zawka kalpui tura thawhdunna thuthlung (MoU) an ziak a. He hun hi Pi Ramdinliani, Secretary, A&FW Department-in a khaihruai a. Department aiawh hian Pi Vanramthangi, A&FW Director chuan MOU hi sign-in, Pu Ramesh Kumar, Managing Director, MULCO chuan MULCO aiawhin a sign bawk a ni.

Thawhdunna Thuthlung ziahnaah hian khuallian Agriculture & Farmers Welfare Department changtu Minister Pu PC Vanlalruata chuan thusawiin, Mizorama kuthnathawktu, a bik takin ran vulha eizawngte tana hmasawnna tur rahbi thar Mizoramin a kai leh ta chu lawmawm a tih thu a sawi a. Agriculture Department leh MULCO-te thawhdunna chu Mizoram tan thil chhinchhiah tlak tak leh ran (a bik takin Bawng) vulhtute tana hmasawnna ropui tak thlentu a nih ngei a beisei tih sawiin, Sawrkar chuan kuthnathawktute dinhmun chawi kan nan theihtawp a chhuah zel dawn tih a sawi bawk a. He thawhdunna hnuaiah hian Ran zun leh ek atanga leitha leh rannung thahna hlote siam chhuah a nih a, chung chu loneitu ten an hman tangkai hunah chuan mipui vantlang hriselna pawhin hma a sawn ngei dawn tih sawiin, Minister chuan thawhdunna hlawhtlinna tak tak chu Department hrang rhangte leh he lama mawhphurhna nei mi pawimawh tak takte bakah kuthnathawktute tanrualnaah thui tak a innghat tih hre reng turin kalkhawmte chu a chah bawk a ni.

Agriculture & Farmers’ Welfare Department chuan National Mission on Natural Farming Scheme hmang hian kum 2025 atang khan hma a lo la tan tawh a. Tunah hian District tinah he Mission hi kalpui niin cluster 304 zet din a ni tawh a, heng cluster-teenkawltu tur hian Community Resource Person (CRP) 608 ruat an ni tawhin, Bio Resource Centre (BRC) pawh 72 din tawh a ni bawk.

Vawiina MOU ziah tak hi National Mission on Natural Farming Guidelines anga kalpui tur a ni a. Guidelines ang chuan Bio-input Resource Centre (BRC)-te hian bawng ek leh bawng zun hmanga siam leitha (organic fertilizers) leh rannung thahna (bio-pesticides)-te siam chhuakin loneitute hnenah an hralh chhuak thin anga, heng Inputs hi Natural Farming hnuaia loneitu in register te chuan hmang ngei tur a beisei an ni ang. BRC-ten hnianghnar taka heng bio-inputs hrang hrang an siam chhuah reng theih nan leh MULCO hnuaia bawng vulhtu ten sum an lak luh belh theih nan MULCO Ltd. Huang chhunga bawng vulhtu te chuan bawng zunte hi BRC te hnenah an hralh thin dawn a ni.

Vawiina MOU sign-naah hian A&FW hotute leh MULCO hotute bakah Ran vulhtu aiawh thahnem tak an tel a. Pi Baby Lalremkimi, Nodal Officer, NMNF-in technical report a pe a. Pi Vanramthangi, Director, A&FW chuan lawmthu sawiin hun hi a khar a ni.