2320/2026-2027

Lunglei, 2026 Mimkut Thla ni 23: Mizoram Bana Kaih (Handholding) Scheme hnuaia Mizoram District Transformation Programme (MDTP) kal tlanga Lunglei District Catalytic Intervention Plan (DCIP) aṭanga siam, Lunglei District-a village council (VC)-te hman tur, Smart VC Application (Android & iOS with Mizo AI Assistant) chu vawiin khan Lunglei District Additional Deputy Commissioner Pi Zoramdini'n a tlangzarh.

Lunglei District Education Office Complex Conference Hall-a Smart VC App tlangzarhna leh a hman dan zir hona, Launching-cum-Training Programme buatsaihah Khuallian Pi Zoramdini chuan Mizoram Bana Kaih Scheme hnuaiah Mizoram District Transformation Programme kal tlangin DC kaihhruaina hnuaiah Lunglei District-ah hmasawnna hrang hrang thawh chhoh mek a nih thu sawiin, DLAO-in District Catalytic Fund aṭanga thil ṭangkai tak tur ngaihtuah nachang a hria chu fakawm a tih thu a sawi a. Lunglei District-a VC-te'n tun lai hmasawnna mila application ṭha tak an hmang thei tur chu a lawmpui thu leh ṭha taka hmang tura a duh thu sawiin, an hna thawh chhinchhiahna leh tar lanna pakhat a nih dawn avangin fimkhur taka hmang tur leh VC lang tlang, hna thawk ṭha nih tum ṭheuh turin a chah a. Smart VC App-in a tum ber chu VC lang tlang siam a nih thu sawiin, lang tlang taka eng kim kalpui a nih dawn avangin a nih tur anga dik tak leh ṭha taka hman tum turin a chah a. Dik tak leh a nih dan tur ang taka an hman theih nan a hman dan pawh uluk taka zir turin a chah.

Lunglei District Local Administration Officer (DLAO) Pu Beitlotha Nohro chuan hun kaihruaiin, Application thar tlangzarh tur chu VC-te tana a ṭangkai dan tur leh an hna thawh a awlsam phah dan tur te a sawi fiah a. Lunglei District chu Mizorama Smart VC Application hmang hmasa ber tur an nih thu sawiin, a hlawhtlin theih nana ruahmanna siamsaktu Lunglei District Bawrhsap Pi Navneet Mann leh Application siamtu LushAITech te chungah lawm thu a sawi.

He hunah hian Smart VC Application siamtu LushAITech aṭangin Chief Operating Officer (COO) Pu Lalremruatkima chuan Application nihphung sawi fiahin, Smart VC App chu hman awlsam taka siam a nih thu a sawi a. VC hna thawh zawng zawng chu khawlpuia chhinchhiah (digitise) tawh tur a nih avangin lehkha bo tih a awm thei tawh dawn lo va, tute pawhin an document mamawh an hai chhuak zung zung thei dawn tih a sawi a. App-ah chuan VC kaihhnawih Act leh Rules hrang hrang dah a nih thu te, DLAO-in admin login an neih bakah, VC member tinte'n User ID an neih dawn thu te, SMS thawnna leh thlalak leh video dah luhna a awm dawn thu te sawiin, Android leh iOS (Apple)-ah a hman theih ve ve dawn bakah, ṭangkai taka hman tur AI dah tel a nih thu te a sawi.

Smart VC Application tlangzarh leh zir hona hunah hian Lunglei District chhunga Village Council 88 aṭangin ai awh pakhat theuh an tel a. LushAITech-a AI Lead Pu Lalfakawma Vangchhia chuan Application nihphung leh a hman dan chipchiar zirtirin, a hmuna VC member kalte phone-ah dah luhsak nghal an nih bakah, a khawih dan a takka zir ho nghal a ni bawk.

Smart VC Application hi Lunglei District chhunga Village Council-te'n an hman tur niin, VC lehkha pawimawh zawng zawng chhinchhiah leh dah luh nan hman a ni dawn a. VC-te'n DLAO Office-ah mahni kal kher lova lehkha pawimawh an theh luh nan te, DLAO Office aṭanga hriattirna pawimawh thawn chhuah nan leh hna thawh dan endik nan te ṭangkai taka hman theih a ni dawn a. VC inrelbawlna leh hna thawh lang tlang a awm theihna tura ruahman niin, VC leh VC-te inbiak pawhna leh thu leh lehkha inthawn tawnna te a awm tel bawk.