2319/2026-2027

Aizawl, September 21: SCERT leh NCERT tangkawpin an buatsaih, ni thum (3) awh ‘Capacity-Building Workshop for Development of Quality Video Content under PM e-Vidya DTH TV Channels’ chu September Ni 21-23, 2026 chhung khan SCERT, Chaltlangah neih a ni a. He programme-ah hian Aizawl District -a sikul hrang hrang atangin zirtirtu sawmhnih an tel a ni. He PM eVidya scheme hnuaiah hian sorkar laipuiin state tinte chu zirna pual liau liaua hman tur TV Channel a pe a, Mizoram pawh TV channel pahnih, MZ128-Zirna Kailawn leh MZ129 – Zirna Lamtluang te pek niin, SCERT kutah a enkawl hna hi a dah a ni. Heng TV channel-te hi DTH hmang te, PM eVIDYA mobile App hmang te bakah SCERT Mizoram Youtube channel-ah te engtiklai pawhin Live a pekchhuah reng a ni bawk.

He workshop hi Pi Zoramthangi Ralte, Joint Director, SCERT chuan ni 21 Sept, 2026 khan a hawng a, Dr. C. Lalrozami, Programme Coordinator, SCERT chuan PM e-Vidya DTH TV Channel chungchanga ICT Cell, SCERT-Mizoram hmalak tawhte sawi zauna a nei bawk. Prof. Amarendra P. Behera, Joint Director, CIET-NCERT leh Prof. Abhay Kumar, i/c PM e-Vidya chuan Google Meet kaltlangin PM e-Vidya DTH TV Channel chungchanga hriat tur pawimawhte an sawi a, workshop a tel turte duhsakna an hlan bawk. Pi Lalnunsiami, Deputy Director, i/c ICT SCERT chuan lawmthu sawina a neih zawhah he hawnna inkhawm hi khar a ni.

He programme-ah hian CIET-NCERT atanga lo kal mithiam panga: Ms. Binita Rai (TV Producer Grade I); Mr. Akhilesh Verma (Production Consultant); Dr. Pankaj Upadhyay (Academic Consultant); Dr. Ashish Kumar Das (Academic Consultant); leh Ms. Monika Bhakuni (Consultant) – ten he workshop-ah hian zirlaite zirna pui thei tur video content buatsaihna atana tangkai tak tak; content planning, script writing, presentation, video production, graphics, editing leh quality review-te an zirtir a ni. 

Vawiin ni 23 September, 2026 hian Pi Caroline Zoramthangi, Director, SCERT chuan workshop a telte hnenah certificate a semin workshop chu a khar a ni.