Vawiin khan Agriculture Minister Pu R.Lalzirliana chuan NLUP Conference Hall-ah All Mizoram Farmers’ Union (AMFU) lehkhabu buatsaih pahnih a tlangzarh.

Pu R.Lalzirliana chuan AMFU-in Mizoram hmasawnna tur a vei chu lawmawm a tih thu sawiin, Politics chauh hi ram siamna a ni lo tih hriaa mi thiamte’n ram tana an thahnem ngaihna thuziak hmanga an au chhuahpui chu a lawmawm hle a ni, a ti a. Sawrkar hnathawk ram danga zinte’n ram hmasawnna tur thil puak chhuah an neih ngai mang loh laia AMFU-in ram dang tih dan an zir chian mipuite chhawr tangkai theih tura a bua an buatsaih chu entawn tlak a tih thu sawiin, Minister chuan AMFU beisei ang ngeiin kut hnathawktute hamthat nan sawrkarin theihtawp a chhuah zel a; Agriculture Directorate building sak that a, kut hnathawktute thiam thil leh thil thar chhuah pho chhuahna tur hmun remchang siamsak tum a ni, a ti. Minister chuan Mizoram chu tui ngah, tuia harsa si a ni chu thil inhmeh lo tak a nih thu leh thil thar leh thil tha tih dawna dodalna awm ziah chu ram than tithutu a nih thu a sawi bawk.

Tlangzarh inkhawm hi AMFU General Headquarters President Pu Joseph H.Thanzuala’n a kaihruai a. AMFU General Secretary Pu Zion Lalremruata’n lehkhabu buatsaih chhan leh a chhunga thu awm tlangpuite a sawi fiah bawk.

Lehkhabu tlangzarh takte hi Prof. H.Lalramnghinglova ziak, “Green Revolution & Mizoram Sloping Agriculture Changkham Technology” tih leh Dr. Chawngkhuma Chawngthu ziak, “1 Minute Vietnam vs Mizoram” tih te a ni a. Lo nei mite’n an chin leh chhawr tangkai nghal mai theih tur, Mizorama lo neih dan hlawk leh tlo zawk a awm theihna tura an zir chianna atanga an ziah a ni.