Vawiin khan Lunglei District task Force on Immunisation chu an Chairman Lunglei DC Pu Abhijit Vijay Chaudhari hovin a office chamber-ah an thukhawm a, National Immunisation Day 2nd Round February 23-25, 2016 chhunga nei tur kalpui dan tur an sawiho.

Lunglei DC chuan rampuma naupang kum 0-5 inkar polio vaccine pek kim tura sorkar laipui hmalak na chu Lunglei District-ah pawh chak taka kalpui a nih mek chu a lawmawm hle a ni, a ti a. Immunisation 1st Round, January ni 19, 2016-a neih takah Lunglei District pumpuiah Health Department bakah ICDS hnuaia Anganwadi worker-te, ASHA volunteer-te leh NGO-te tanruala zarah zaa 97% chu hlawhtlinpui a ni a, hemi atan tha leh zung sengtu zawng zawngte chungah lawmthu sawiin 2nd Round-ah pawh nasa lehzual beihpui thlakin naupang kum 0-5 zawng zawngte polio vaccine an dawng ngei turin tan la theuh turin a hrilh.

Lunglei CMO Dr.VLMS Dawngliana pawhin thu sawiin naupangte vaccine pek hi Health Department-in a kalpui reng thin bakah hian hetianga sorkar laipuiin vaccin pek beihpui thlak a ruahman thin chu a lawmawm takzet a ni, a ti a. Immunisation 2nd Round tana hian a thawktu turte training pek vek ni tawhin hemi chungchanga mipuite a zau thei ang bera hrilhhriat nan chanchinbu, radio leh TV kaltlangin hma an lak mek thu a sawi bawk.

Immunisation Programme-a Nodal Officer Dr. Lalparliani chuan 1st Round-a an hmalak dan chipchiar takin Committee hmaah a tarlang a. National Immunisation 1st Round-ah Lunglei District chhungah Main Centre 16 siamin heng Centre-te huamchhungah mihring cheng zawng zawng belkhawm chu 1,54,935 niin In awm zat chu 29,067 a ni a; heng zingah hian naupang kum 0-5 awm zawng zawng chu 16,143 niin vaccine an pek theih zat chu naupang 15,545 (97%) a ni. 1st Round-ah hian Vaccine Booth 218 hawngin vaccine bur 1093 hmanral a ni a, 2nd Round-ah chuan Bazarpui hmunte leh Sumo Stand-ah Supervisor dahin Booth hawn belh a nih tur thu a sawi.

Rampumah Polio Vaccine pek beihpui thlak hi kum 1995 atanga kalpui tan a ni a. March ni 27, 2014 khan sorkar laipui chuan India hi 'polio free' ah a puang tawh a; amaherawhchu thenawm ram thenkhatah polio case a la awm thin avangin India ramah pawh kumtin polio kai palh naupang 35,000 vel awma hriat a nih avangin, inven nan leh fimkhur thuah sorkar chuan rampumah hian polio vaccine pek hi a la kalpui zel tho a ni.