Vawiin khan khan Serchhip DC Conference Hall ah Serchhip District chhunga Centrally-Sponsored Scheme kalpui anih dan endiktu Serchhip District Vigilance and Monitoring Committee chu an Chairman Pu CL Ruala, Member of Parliament, Lok Sabha hovin an thukhawm a, he hun hi Co-Chairman Pu Ronald Sapa Tlau, Member of Parliament, Rajya Sabha, Pi Vanlalawmpuii Chawngthu, MLA, Hrangturzo Assembly Constituency, Pi K.Lalrinzuali, Jt. Secy., Rural Development Department ten an hmanpui a, Serchhip District a Centrally Sponsored Scheme kalpuitu Line Department te leh Tlawmngai Pawl aiawhte an tel tha hle a ni.

Meeting-ah hian DRDA kaltlanga hnathawh zing ami MGNREGS hnuaiah kum 2015-2016 kum kal mekah hian Serchhip District ah ni 37 chhung inhlawhna siam anih tawh thu report a ni a, Hna 192 (Serchhip R.D. Block – 120, E.Lungdar R.D Block – 72) thawh niin heng zinga 66 hi thawh zawh tawh a ni a, Kum 2015-2016 chhung atan Serchhip R.D. Block huam chhungah tun thlengin Job Card 10759 pek chhuah a ni a, E.Lungdar R.D. Block huam chhungah Job Card 3305 pek chhuah a ni bawk. Ni za inhlawhna atan hian Rs nuai 928.31 (Serchhip R.D. Block – Rs nuai 711.51, E.Lungdar R.D Block – Rs nuai 216.80) pek chhuah tawh niin ni za inhlawhna bakah material component leh administrative cost nen avaiin Rs nuai 1204.83 (Serchhip R.D. Block – Rs nuai 910.14, E.Lungdar R.D Block – Rs nuai 294.69) hman tawh a ni.

Integrated Watershed Management Programme (IWMP) hnuaiah Project pasarih – IWMP Serchhip-I, IWMP Serchhip-II, IWMP Serchhip-III, IWMP Serchhip-IV leh IWMP Serchhip-V, IWMP Serchhip-VI leh IWMP Serchhip-VII awmin IWMP-I hi thawh zawh fel a ni thawkhawt tawh a; tunah hian , IWMP Serchhip-VI leh IWMP Serchhip-VII hi hna bul tan a ni mek bawk. PMGSY chungchangah Chhingchhip-Hmuntha Road, Chhingchhip-Thentlang Road, Chhingchhip-Hualtu Road leh Hmuntha – Khawbel Road te pawh zawhfel tep an nih tawh thu tarlan niin East Lungdar – Sailulak Road pawh a thawktu contractor thlak anih thu leh contractor tharin chak taka hna a thawk mek thu tarlan a ni a, Lungpho-Hmunzawl Road chu metre 250 vel black top ngai a la awm thu tarlan a ni a; Chhawrtui – Vanchengpui Road leh Rullam – Lungpho Road pawh thla thar March 2016 hian zawhfel hman inbeisei anih thu tarlan a ni.

IAY kaltlangin kum 2015-2016 chhung hian chenna In 34 (Serchhip RD Block – 22, East Lungdar RD Block – 12) sak zawh tawh niin IAY beneficiary thlan chungchanga sawisel tur a awm leh awmloh zawhna chu Tlawmngai Pawl hruaituten engmah sawisel tur an hriat rih loh thu in an chhang a ni.

National Social Assistance Programme hnuaiah  Tar Pension (IGNOAPS) dawngtu mi 1567 (Serchhip R.D. Block – 903, E.Lungdar R.D Block – 664) an awm mek a, Pension hi Bank kaltlanga pek vek niin kum 80 chung lamin thla khatah Rs 500/- an dawng a, kum 80 hnuai lamin thla khatah Rs 250/- an dawng a ni. Hmeithai Pension (IGNWPS) dawngtu mi 164 (Serchhip R.D. Block – 84, E.Lungdar R.D Block – 80) an awm mek bawk a, Rualbanlo tanpuina (IGNDPS) dawng mi 47(Serchhip R.D. Block – 24, E.Lungdar R.D Block –23) an awm mek bawk.

Tar Pension (IGNOAPS) hi September, 2015 thleng pek an ni tawh a, (IGNWPS) hi June, 2015 thleng pek tawh niin Rualbanlo tanpuina (IGNDPS) hi June, 2015 thleng pek tawh an ni a; tanpuina sum rawn thlen hunah pek chhunzawm leh tur an nih thu tarlan a ni. Swachh Bharat Mission (Grameen) hnuaiah Individual Household Latrine 422 siam niin Serchhip R.D. Block ah 304 (APL - 126, BPL - 178) leh East Lungdar R.D. Block ah 118 (APL - 71, BPL - 47) siam a ni.

Chairman Pu CL Ruala chuan District a thawktu sawrkar official te chu mipuite hnaih a thawktu leh sawrkar kut leh ke ber an nih avangin an tanlakna leh thahnemngaihna tel lo chuan hmasawnna a kal tak tak thei lo a ni a ti a, theihtawp chhuah a tan lakpui zel turin a ngen a, ram kang vanga ramngaw chereu chak lutuk in mihring mai bakah nungcha leh thlai te, kan sik leh sa te chen a min nghawng nasat tawh em avangin mipuite zirtir kawngah nasa lehzuala tan lak a tul thu a sawi bawk.

Co-Chairman Pu Ronald Sapa Tlau pawhin official te chu hna tha taka an thawh theih nan an chhia leh tha hriatna te hmang uluk tura chahin Sawrkar Laipui scheme duan thin te hi India ram puma in angtlang a hman theuh tura duan a nih thin laiin kan ram leilung, sik leh sa leh nunphung mil lo a awm thin a, hetiang thilah hi chuan Sawrkar Laipui kaihhruaina dan siam ang lo deuh hleka her rem a tul anih pawhin rilru thianghlim tak leh rilru tha tak pu chunga thil tha zawk tur anih vanga local adjustment an lo siam anih pawhin an hriatthiam dawn thu leh Sawrkar Laipui lama sawi fel sak a ngai anih pawh a tanpui an in huam reng thu a sawi bawk a ni.