Vawiin khan Champhai District tan Sorkar hmalakna thar New Economic Development Policy chu Agriculture Minister Pu R. Lalzirliana’n Champhai Venglai Community Hall-ah a hawng. Minister hi East Tuipui bialtu MLA, Mizoram Youth Commission Chairman Pu T. Sangkungan a tawiawm a ni.

Khuallian Pu R. Lalzirliana chuan NLUP chhunzawmna tur Policy tha leh zual NEDP Sorkarin a duang chhuak leh ta hi kan vannei tak zet a, mithiam zawk ten uluk taka an duan niin NEDP hi a nihna ang taka kan hman phawt chuan Mizoram hi kan kang dawrh dawn a ni, a ti a. NEDP chu mirethei thleng phak anih thu sawiin, tuna rim taka thawk thin ten an thawhchhuah an thlai thar te phurhna tur kawng Agriculture Link road laihna tur pawisa pawh dah fel tawh thu tarlangin, kawng 416 laih thar anih tur thu leh laih tawh sa leiminin a hnawh te then fai vek a nih tur thu a sawi a. Kut hnathawtuten man tlawm zawka khawl an chhawr theihna tura duan Custom Hiring Centre kalpui zingah Champhai District- chu a hlawhtling berte zinga mi a nih thu a sawi a. 

Agriculture Minister chuan NLUP kalpui mek chu Policy tha tak a nih thu leh a dawng tur thlan dan pawh a ‘fair’ tawk thu te, a dawng tur awm chin chu pek zawh thawhkhat tawh thu a sawi a. Mirethei leh hnuaihnung zawkte thlengphak hmalakna anih avangin Sorkarin tih tawp mai a tum loh thu a sawi bawk.

Minister Pu R. Lalzirliana chuan Police indaih loh chungchang tarlangin, Police Battalion hnih dawn post ruak awm mahse, tun hma aia police hnathawh that tawk loh thu sawi tur a tlem thu leh, Law & Order hmanga chinfel theih loh thil tawn a la awmloh thu a sawi a. Police Officer thenkhat zingah mahni naute mimal hnaa chhawr ching an awm a nih chuan sawi mai a tawk tawh dawn lova action lak a ni ang, a ti bawk.

MYC Chairman Pu T Sangkunga pawhin thu sawiin, Mizoram Sorkar leh a hruaitute hmalakna zara ram sum din hmun a thar viau tawh thu sawiin, 13th Finance Commission aiin 14th Finance Commission-ah chuan cheng vaibelchhe sangkhat dawnin kan pung a ni, a ti a. NEDP Sorkarin a duangchhuak chu lawmawm atih thu sawiin NEDP hi a nihna ang taka kan kalpui chuan chhungkua kan thang ang a, sorkar pawhin a chhawr dawn a ni, a ti bawk.

NEDP hawnna hun hi Champhai District bawrhsap Pu Vanlalngaihsaka IAS, chuan kaihruaiin, kut hnathawktu mi 200 chuang an kal khawm a. Agriculture Directorate atangin officer-te leh Champhai District-a department hrang hrang hotute an tel bawk.

Minister Pu R. Lalzirliana hian tukin zing khan Champhaia NEDP hnuaia Onion Nursery siam chu a hmunah a tlawh a. Thawhtan (14.11.2016) khan Tuipui kama Biate Farming Society te’n NEDP Onion Nursery an siam chu a lo tlawh tawh bawk a ni. NEDP hnuaia Mizoram Sorkarin Agriculture Department chu Purun ching tura a tih angin purun kui tiah (germination)-na tur Onion Nursery hi hmun hrang hrangah siam a ni.