Vawiin khan College of Veterinary Sciences & Animal Husbandry, Selesih, Aizawl chuan 19^th College Week Closing Function an hmang a, Pu C Lalrinsanga, Agriculture Minister chu Khuallian niin he hun hi a hmanpui.

Agriculture Minister Pu C Lalrinsanga chuan thu sawiin,” College of Veterinary Sciences & Animal Husbandary, Selesih, Aizawl chu College la upa lo tak ni chung si a result tha tak tak leh College upa zawk te lehpel hial a hma in sawnna hian zirlaite leh thawktute inpekna ati lang chiang hle a ni,” ati a ,“Exam a tih that piah lamah kan thiamna leh theihna te hi kan ram tan engtin nge kan hman tangkai theih ang tih hi kan ngaihtuah fo tur a ni,” ati bawk. Pu C Lalrinsanga chuan CVSc & AH College Week hlawhtling taka hman ani chu lawmawm atih thu sawiin he College atanga zirchhuak mi hlawtling tak tak an awm thin chu fakawm a ti a, chutih rualin Mizoram chu ran vulh tamna ram ni chung si a ran chaw man a san hle thu tar langin, CVSc & AH a thawktute leh zirlaite chu ran chaw intodelhna kawngah leh tlawm zawka tharchhuah anih theih nan hma la turin a fuih bawk.

Dr Lalnuntluangi Hmar, Dean, College of Veterinary Sciences & Animal Husbandry, Selesih chuan kal khawmte lawmna thu sawiin CVSc & AH dinhmun leh hma lakna kal mekte a tar langa,” He College hian Mizoram hmun hrang hrangah a thlawn in ran damlo entirna vawi 73 a lo buatsaih tawh a, lo neitu 7000 chuangte hnenah zirtirna pe tawh in ran enkawlna kawngah khaw vil bik 14 a nei tawh bawk a ni,” a ti a,”Mizoram chhunga ran natna chhuichhuah leh enkawl naah pawh he College hian kawng tam takin a pui  thin a ni,” a ti bawk.

19^th Annual College Week Function ah hian BVSc & AH 3^rd year ten pakhatna hauh in 1^st year zirlaiten pahnihna lawmman an dawng a, Student Welfare Officer in Week an hman dan tlangpui te tar langin Khuallian in lawmman semna hun a hmang a, Dr Faizal Ahmed, Professor in lawm thu sawina hun a hmang bawk.

College of Veterinary Sciences & Animal Husbandry ah hian Bachelor of Veterinary Science& Animal Husbandry zirna hi 1997-98 khan tan a ni a, 2018-19 hian zirlai 358 awmin, BVSc & AH zirlai 287, MVSc zirlai 63 leh PhD 8 an awm mek a ni. PhD zirna hi ram pawn a Veterinary Sciences zirna In hrang hrangte nen inthlun zawm a kalpui a awm a, India ram a zirna In tha tak tak IVRI, Izatnagar, GADVASU, Ludhiana, ICAR-NRC on Mithun, Nagaland, ICAR-NRC on Yak, Arunachal Pradesh te an ni. CVSc & AH hnuaiah hian project hrang hrang kalpui niin project 82 hlawtling taka kalpui alo ni tawh a, University sum hmanga project kalpui 13 leh pawn lam fund hmanga kalpui project 12 a awm mek bawk a ni. CVSc & AH, Selesih hmalakna hian Zovawk bik hi zirchian niin Vawk chi (breed) hrang hrang zingah mumal taka ziah luh (registered) alo ni tawh bawk a ni. CVSc & AH hian India ram chhunga Veterinary College zingah kum 2012 leh 2013 khan ICAR PG Entrance Exam ah pahnihna alo hauh tawh a kum 2014 khan pakhatna dinhmun a chang nghe nghe bawk a ni.