Higher & Technical Education Minister Dr. R. Lalthangliana chuan vawiin khan Saitual College tlawhin Rs nuaih 100 senga sak Saitual College Auditorium a hawng a, hemi rual hian Saitual College a NIELIT Study Centre thar a hawng nghal bawk.

Auditorium thara a hawnna inkhawm neih ah Minister Pu Lalthangliana chuan thu sawiin College changtlung tak an nei chu a lawmawmin Mizoram chhunga College dang tam takin an neih veloh thil chi hrang hrang a hmu tih a sawi a, an College building leh bungrua te chu Mizoramah pawh a tha ber hlir ni a a hriatthu sawiin heng te hian zirna ah hlawhtlinna a ken tel ngei a beisei thu a sawi a ni.

Zirlai kalkhawmte fuihin Minister chuan khawi hmunah pawh awm ila kan ngaihtuahna hian khawvel hi huphurh en in en lo sela, khawi hmun atang pawhin tumruhna leh Pathian tihna nen chuan mihlawhtling leh miropui tak kan chhuak thei ani a ti a, College zirtirtute pawh miropui leh chhenfakawm an chherchhuak thei ani tih in hre thar reng turin a chah bawk a ni.

Saitual College a Science zirna a awm theih nan District Headquarters an nih a ngai tih an sawi chu a lo hriat thu sawiin reilote ah Science zirna din thei tur dinhmunah an din ngei a rin thu a sawi a, College zirlaiten College chhunga Hindi zirna changtlung an neih an duh thu an sawi chu a ngaihpawimawh thu a sawi a, College mamawh a hnena an thlen te chu lo enzui zel a tum thu a sawi a ni.

Government Saitual College Auditorium hi UGC atanga tanpuina an hmuh Rs nuaih 100 a sak niin a zau zawng hi a dung 74 ft, a vang 50 ft a ni a, a pumpuia a zau zawng hi 3700 sq. ft a ni. Auditorium hi chhawng hnih niin a hnuaiah hian Gymnasium changtlung tak dah a ni a, Auditorium hi mi 250 len theihna niin January ni 11, 2016 a sak tan niin October ni 8, 2018 khan sak zawh a ni.

NIELIT Computer Study Centre hawn thar ah hian seat 40 awmin CCC zir theihna tur a ruahman a ni.

Auditorium hawn inkhawm hi Dr. Lalsiamhnuna, Principal, GSC in a kaihruai a ni.

Minister hian Government Saitual College building hrang hrang leh an hmunhma te chik takin a fang kual bawk a ni.

Auditorium hawn programme a zawh hnu hian Minister hian Saitual damdawiin a tlawh nghal bawk a ni.