Vawiina khan Mizoram Legislative Assembly Speaker Pu Lalrinliana Sailo chuan Tuichangral North Group YMA khawmpui vawi 45-na Tlangpui a neih chu khuallian niin a hmanpui. February Ni 26 atanga 28 thleng awh tur Tuichangral North Group YMA Conference-ah hian "Ram leh hnam humhalh"  tih chu thupuiah hman a ni.

Khuallian chuan Tuichangral YMA member-te chu zonun ze mawi chawinunga, ram leh hnam chhan nana penchuak tura fuihin, an thiltih  engkimah  sawrkara innghat mai lova mahni tawka intodelh tum hram hram turin a chah a.  

Tlangpui khuain Group YMA Conference thleng thei tura Hall puitling  tha tak a lo neita chu lawmawm a tih thu leh hmalatute chhuanawm a tih thu a sawi a. Hruaitu fel leh tha tak takte hruainaa Tuichangral North Group YMA a kalzel chu hmuh nuam a tih thu a sawi bawk.

Pu Lalrinliana Sailo chuan bialtu MLA leh PHE Minister nibawk hmalaknain National Rural Drinking Water Programme kaltlangin Vangtlangah  Rs 1,36,45,000,  Riangtleiah  Rs 1,49,38,000 leh  NABARD kaltlangin Sialhawkah  Rs 12,61,78,000 senna tur  tuilakna siam tuma hmalak mek a ni, a ti a.  Khuallian chuan ram leh hnam humhalh kawngah tanlak angai takzet a, Citizenship amendment bill sawrkarin  theihtawp chhuahin a do tlat thu a sawi a.  YMA member kalkhawmte hnenah eng hna pawh a te ber thleng pawha thawh hrehloh chu ram leh hnam humhalhna kawnga thil pawimawh tak anih thu hrilhin, kan ram atanga sum luangchhuak tam tak hi kan thawh theih ve ngei tur kan thawh peih loh vang a ni, a  ti a. Mahni thawhloh hlawh lak chu thil tenawm ber ani tiin, hlawh nei tur chuan thawh angai a, hna thawh chu a zahawm a ni a ti bawk.

Pu Lalrinliana Sailo chuan thalai tam zawk te eizawnna ngelnghet siam sak tura Skill development lama tanlak thar lehzual angaih thu a  sawi a. Hna tha leh rotling siam theihna turin mahni khua leh a chhehvela hmasawnna ruhrel siam te YMA ten a tul ang zela lo thlithlai thin turin a chah a. Tuichangral North Group YMA Conference hun hlawkthlak leh hlimawm tak hmang turin khawmpui hmangtu te duhsakna a hlan a ni. 

Vawiin inkhawmpui program hi Pu PS Hmangaihzuala, President, Tuichangral North Group YMA in a kaihruai a. Member thite sunna Upa H.Lalhmingthanga, Lungtan Branch kaihhruianain neih a ni a. Pu RC Rodawla, Treasurer, Sub-Hqtrs YMA Champhaiin thusawiin YMA memberte fuihna a nei a. Pu Lalnunfela, SDO, PHE Department Khawzawl Division-in  'Tuihna hunhalh' tih thupui hmangin Tuihna humhalh kawnga tanlak angaih zia a sawi a, YMA memberte tuihna humhalh tura penchhuak theuh turin a sawm a.Khuallianhian khawmpui tanpuina turin Rs 35000 a hlan bawk a ni.

Tuichangral North Group YMA hnuaiah hian khaw  9 awmin Branch 10 a awm a. Member 4000 vel an awm mek a ni, kumin hian khawmpui Palai 500 vel an awm a ni.