Nimin tlai khan I & PR Minister Pu Lalruatkima'n Vanapa Hall ah Indian Council for Cultural Relations (ICCR), Art Novelty Gallery, Aizawl leh Art and Culture Department tangkawpte buatsaih lemziah pholanna 'Cultural Mosiac : An International Art Exhibition' tih chu a hawng.

I&PR Minister Pu Lalruatkima chuan lemziak hi awmze thuk leh zirchian tham, thawnthu leh zirtir tam tak nei a ni fo thin a. Heng artist-te kutchhuak atang hian hnam ziarang te,  culture leh history te a hriat theih a, hnam chanchin tarlanna hmaraw tangkai tak a ni thei a ni, a ti. Mizorama a vawikhatna atana ICCR bultuma hetiang International Art Exhibition buatsaih chu lawmawm tiin Mizoram art hmasawnna atan thil  chhinchhiahtlak tak a nih thu a sawi a. He Exhibition hian Mizo artist te tan chona thar a siam sak a beisei tih sawiin ICCR hmalakna chu Mizoram mawina leh Mizote chanchin pholanna kawngah thil tangkai tak a nih ngei a rin thu a sawi bawk.

Pu N. Munish Singh, Regional Director, ICCR, Shillong chuan Mizoram chu mawi a tih thu te sawiin Mizoram Sawrkar leh art lam pawl te nen thawhhoa, programme dang te pawh la buatsaih zel an tum thu a tarlang. Pi Lalhming Mawii, Curator, Art Novelty Gallery chuan hetiang a ram chung mai nilo ram dang artist te pawh huam tela, art exhibtion neih chu a rilru a hun rei tak atanga a lo suangtuah thin thu te sawiin a tak a thleng ta hi Mizoram art tan rahbi thar kaina a ni, a ti.

Cultural Mosiac ah hian India state hrang hrang  leh Bangladesh, Bhutan leh Slovakia atangin tein lemziak mi 15 an tel a, an kutchhuak 40 pho chhuah a ni a. Art Exhibition hi a duh apiang tan man nei lovin March ni 2 thleng a chhim thei dawn a ni.