No.3207/2021-2022

Aizawl, the 30th November 2021 : Vawiin khan Agriculture Minister Pu C. Lalrinsanga chuan hmarchhaka loneituten Information and Communication Technology tangkai taka an hman theihna tur sawihona leh research paper hrang hrang webinar hmanga zir hona Agriculture Conference Hall, Directorate of Agriculture-ah a hawng a. He hun hi Krishi Vigyan Kendra, Siaha District, Directorate of Agriculture, Aizawl leh ICAR-NCPIM, New Delhi te tangkawp buatsaih a ni.

Minister Pu C. Lalrinsanga chuan thu sawiin khawvel hmasawnna in a ken tel Information & Communication Technology chu Agriculture huang chhungah tangkaina tam tak a nei a, farming system chungchanga inzirtirna (awareness) bakah hriattur pawimawh semdarh kawngah ICT chu hlamchhiah theih a ni tawh lo, a ti a. Khawvel sik leh sa inthlak danglam zelah thlai ei chhetu (pest) hrang hrang ten bu an khuar zel a, heng chungchanga harsatna hrang hrang loneitu ten an neih hi ICT hmanga sutkian theih a ni a, thiamna thar leh tangkai zawk leh hlawk zawka loneituten an hman theih tur Mizoram sawrkar pawh in ‘Loneitu mobile app’ chu Kum 2020, July thla khan lo tlangzarh tawh a ni, a ti a. He Mobile App. ah hian lo neih kaihhnawia hriat duhte en zung zung theihna a ni a, thlai chin dan hrang hrang, thlai chi mamawh zat, thlai thar chhuah theih zat, thlai hmun enkawl chhunzawm dan, thlai ven dan leh thlai eichhetu hriat theihna leh a thahna hlo siamdan thlengin a awm a ni, a ti a. Hemi bakah hian ICT kal tlanga hmalakna dang buatsaih leh chu Farmers’ Helpline hi a ni a, helpline ah hian telephone hmangin loneituten an harsatna tawhte mithiam hnenah an thlen thei a ni, a ti a. Minister chuan ICT hmanga loneitute hman tangkai theih thil ngaituah chhuah zel chu vawiin webinar hian a tum ber a ni a, India ram hmun hrang hranga agriculture scientist te nena hlawk taka he hun hi hman a nih theihnan duhsakna a hlan bawk a ni.

Webinar session hi then hnih a neih a ni a, thenkhatna ah hian Dr. H. Vanlalhmuliana, Senior Scientist and Head, KVK Siaha chuan webinar chhimtu zawng zawngte lo lawmin, duhsakna thilpek Minister hnenah hian a hlan a, Dr. Meenakshi Malik, Scientist, Dr. Mukesh Sehgal, ICAR-NCIPM, New Delhi hnen atangin Impact of Accesss and Usage of ICT in Integrated Pest Management at North-East Region of India leh Need ICT in plant protection strategies ngaihthlak a ni a. Pu James Vanlalluaia, Additional Director (R&E) hnen atangin ICT chungchanga hriattur pawimawh ngaihthlak a nih bakah Pi C.Rachel, Subject Matter Specialist, KVK, Siaha hnen atangin lawmthu sawina neiin thenkhatna hun hi a khar a ni.

Technical Session-thenhnihna hi Dr. Prabhuraj Aralimarad, HOD, Department of Entomology, UAS Raichur in a kaihruaia, ICAR-IIT, Kanpur, KVK Siaha Mizoram, CPGS, CAU (Imphal) Umiam, Meghalaya leh hmundang atangin scientist te paper hrang hrang present leh sawihona hun hman a ni.