No.3208/2021-2022

Aizawl the 30th November, 2021: Vawiin khan Pu T.J Lalnuntluanga, Hon'ble Minister, EF&CC, Law & Judicial, etc., chuan Mizoram State Boxing Championship vawi 42 chu Serchhip Boxing Hall-ah a hawng a. Intihsiaknaa tel Boxer rualte chu hnam dangte chung en bik lovin theihna chungnung tak an nei tih inhre reng turin a fuih.

A hawnna inkhawmah Minister hian, zofate hian Pathian zarah hma kan sawn nasa tawh hle a, chutihrual chuan mi tam tak thinlungah hnamdangte tluk tawk lova inhriatna, en sanna te, inngaihhniamna leh tul lova hnam dangte zaha mahni hnam zahpuina thinlung nei kan la tamin ka hria. Boxer ten Sportsman thinlung pu chunga khawvel hnam dang te laka chhungnunna thinlung pu turin leh zoram mipui te tana hma hruaitu ni turin ka chah duh che u a ni, tiin a fuih a. Boxing chu mahni rih zawng tlukpui inbeihna a nih avangin hnam dangte chung en bik lovin theihna chungnung tak in nei tih inhre reng rawh u, a ti. Mizoramin Boxing ah hma a sawn zel theih nan hruaitu inpe tak tak a nei thin chu lawmthu a sawi a, Boxing tuimite tana intihsiakna fel fai tak an buatsaih leh thei chu lawmawm a tih thu a hrilh a ni.

Khualzahawm Pu TC Pachhunga, Vice Chairman, Sports & Youth Services Board pawhin thusawiin, vawi tam tak Mizoram hming titha tawhtu Boxing Association te hmalakna te sawrkarin theihtawp a chhuahpui zel dawn tih a sawi a. Sports hmasawnna ah Mizoram kan that avangin sawrkar laipuiin Centre of Excellence panga a thlan pawhin Mizoram kan tel a, Boxing chu Discipline pakhat a ni nghe nghe a ni. Mahni rihzawng tlukpui inelna a nih avangin khawvela hmingthan theihna remchang kan neihna infiamna a ni a, hma a sawn zel theih nan kan bei zel dawn a ni, a ti.

He hunah hian Pu Kumar Abhishek, IAS, Serchhip bawrhsap leh Organising Chairman ni bawk pawhin thusawiin, khuallian leh khualzahawmte leh 42nd Mizoram State Boxing Championship, 2021 a hlawhtlin theih nana thawktute zawng zawng chungah lawmthu a sawi a. Boxing-ah Mizoramin theihna sang tak a nei tih hre reng chunga thalaite an inbuatsaih deuh deuh a tul hle nia a hriat thu a tarlang bawk.

Tun Mizoram Championship ah hian District 9 atangin Boxer 145 an fuan khawm a, Category 42 ah inelna neih tur niin inhnek (bout) 160 awm tura duan a ni a. Team Champion leh Best Boxer te thlan an ni ang.

A hawnna inkhawm hi Serchhip District Boxing Association President, Pu Kapliana Pachuau in a kaihruai a, Mizoram Boxing Association aiawhin an Sr. Vice President Pu F. Lalnienga'n thusawina hun a hmang bawk a ni.