No.3206/2021-2022

Aizawl, the 30th November 2021 : Health Minister Dr. R. Lalthangliana’n vawiin khan HIV/AIDS dona kawnga NGO lian tak Mizoram State AIDS Control Society (MASCS) in an thawhpui – Alliance India ten World AIDS Day 2021 puala programme leh HIV/AIDS dona kawnga sulsutu leh hmahruaitu te tawnhriat, hmalak dan leh hna thawh dan te sawihona Hotel Floria a an buatsaih chu a hmanpui.

Dr. R. Lalthangliana chuan HIV veite zirchianna HIV Estimation 2019 in India ram chu HIV/AIDS tlem tawhna ram ‘low prevalance country’ tia chhinchhiah a ni mai bakah state tam zawka HIV positive an tlak hniam mek thu te a tarlan thu a sawi a. Chutih laiin state thenkhatah ram pumah HIV/AIDS punna rate aia a punna sangte a awm a, chung zingah chuan Mizoram pawh hi kan tel a, hei hi thil ngaihtuahawm tak a ni, a ti a. A dona kawngah pawl hrang hrang te inkara thawhhona chak zawk kan mamawh tak zeta, chumi atan chuan theihtawp kan chhuah tlana kan theihna zawng zawng nen hma kan lak a tul a ni, a ti.

Health Minister chuan Mizoramin kawng tam takah thatna kan neih rualin HIV/AIDS dinhmuna kan sanna te, cancer vei kan tam dan te leh zuk leh hmuam a kan hluarna te chu a chhuanawm loh thu a sawi a. Mihring dam hun chhung reiloteah kan mihring puite leh tanpui ngaite tanpui leh an tana luanchhuah leh rawngbawl sak chu kan damna chhan pawimawh tak nise tiin he huna kalkhawmte chu a chah a ni.

He hunah hian Health Minister chuan Alliance India ina lehkhabu an buatsaih ‘Scripting Change Alliance India’s COVID Response’ tih chu a tlangzarh bawk a ni.

Vawiin programme ah hian Alliance India chuan Mizorama HIV/AIDS dona kawnga thawk mek pawl hrang hrangte sawmin chak zawka hma lak dan tur kawng hrang hrang te an sawipui a ni.