Vawiin khan Agriculture Minister Pu C. Lalrinsanga chuan a pisa ah Fostering Climate Resilient Upland Farming Systems in the North East (FOCUS) officer te kovin kum 2019 chhunga an hmalakna leh kumthar hmachhawp te a sawipui a, he Project hnuaia hnathawh mek leh hmalak zel dan turte an thlirho a ni.
FOCUS hi United Nations Organisation (UNO) peng pakhat International Fund for Agriculture Development (IFAD) hnuaia project a ni a, Mizoram leh Nagaland ah kalpui mek a ni.
FOCUS hi Mizoram ah chuan January ni 25, 2018 ah bultan niin kum 6 chhung kalpui tura ruahman a ni. He project hian Mizoram chhunga District 4 : Champhai, Kolasib, Serchhip leh Mamit a huam a, khaw 272 a chhungkaw 64,500 a huam dawn a, Lo neih, Huan nghet neih, ranvulh leh kuthnathawka eizawnna kawng hrang leh tharchhuah enkawl zui a, man man zawka hralh chhuah thlengin a pui dawn a, Agriculture link road km 200 a thuam tha bawk ang. He Project hnuaiah hian Farmers Interest Group (FIG) 926 din a ni tawh a, khaw tinah Lead Farmer leh Community Animal Health Worker ruat an ni tawh bawk a ni.
He Project in a tum ber chu thingtlang lo neih a eizawng ten hlawk zawk leh sik leh sa chhe mek siam tha zawnga lo neih an kalpui theihna tura tanpui a ni a. He FOCUS Project hnuaiah hian thawktu (Contract) 240 lak thar an ni a, He Project hi Department 4, Agriculture, Horticulture, AH&Vety leh Land Resources, Soil & Water Conservation ten hma an lakna tura ruahman a ni.
Meeting-ah hian FOCUS Project hnuaia Project Management Unit hrang hrang ten kumhlui lama an hmalakna report an pe a. Kumthar atana hmachhawp te Minister ho hian an thlirho nghal a ni. Agriculture Minister chuan kan lo neih dan kalhmangah leh land use chungchangah 3-tier system hmanga tlangram lo neih dan kalpui thar a tum thu leh chu ruahmanna chu FOCUS project nen a in hmuh rem chiah avangin a lawmawm dan a thuah hnih hle a ni a ti.
Meeting ah hian Minister chuan FOCUS hnuaia funding chungchang sawiin fund flow khaihlak lo tura tan lak thar a tul thu leh hemi tur hian amah pawhin theihtawp chhuah a tum thu a sawi a ni
Meeting ah hian Mission Director Pu Rohmingthanga Colney, State Project Director Pu R.K.Nithanga leh FOCUS Project Management Unit a Deputy Director te leh FOCUS Officer te an tel a ni.
