Vawiin khan Sports & Youth Services Minister Pu Robert Romawia Royte chuan Khelo India Youth Games, 2020 a Medal dawngte lawmpuina leh chawimawina a pisa ah neiin, thingpui inhona a neihpui a ni.

Khelo India Youth Games, 2020 hi India rama a vawi thumna atan Gwahauti-ah January Ni 10 atanga Ni 22 chhunga neih a ni a, Mizoram atangin Players 77 leh anmahni tawiawmtu leh buaipuitu coach leh officials dangte nen mi 100 bawr vel an kal a ni. Sports discipline hrang hrang 20 ah, Mizoram chu discipline 7- Judo, Table Tennis, Weightlifting, Wrestling, Football, Boxing, Hockey-ah te a qualify a. Gold 3, Silver 2, Bronze 5 la in, a pumpuiah Mizoram chu 24th na a ni a. Boxing ah Franky H. Lalruatpuia (U-17,46) - Silver, Laldinsanga (U-17,50Kg) - Bronze, Lalhruaitluanga (U-17, 70Kg) – Bronze an la a ni. Judo ah Chinlunmawii’n (U-21 below 52 Kgs) Gold a la a, Table Tennis ah  Jeho Himnakulhpuingheta leh Alberto LR. Ruata ten Gold an la a, Single ah Jeho Himnakulhpuingheta’n Bronze a la bawk a ni. Weightlifting-ah Jacob Vanlaltluanga leh Silvana Beihrothatlo ten Bronze an la ve ve bawk a ni. Wrestling ah Elizabeth Rohlupuii’n Broze a la a, Under 17 Football-ah Mizoram team te hian Gold an la bawk a ni.

Minister Pu Robert Romawia Royte chuan thu sawiin, Khelo India Youth Games, 2020-a  medal la zawng zawng te hnenah lawmthu a sawi a, harsatna tam tak karah Mizoram aiawha infiam mi kal ten medal 10 an hawn thei chu, inpekna leh tumruhna rah a ni, a ti a. Khelo India Youth Games a Mizoram atanga infiam mite a tam thei ang ber an  qualify theih nan National School Games a tam thei ang ber tel tir dan sawrkar chuan a ngaihtuah dawn a ni, a ti a. Infiam mi ten Daily Allowance an dawn thin, state chhunga atan Rs 250 atangin Rs 350 ah tihsan a ni a, state pawn atan Rs 400 ah tihsan a ni bawk a, duhthusam nilo mah se, sawrkar chuan a phaktawkin tan a la a ni, tiin a sawi. Mizoram sawrkar chuan Lungleia SYS Hostel thar a peih fel tep a, training tha zawk an neih theihnan playground changtlung zawk nei turin ruahmanna a siam a ni, a ti a. Minister chuan Kum 2 course a SYS Academy kalpui mek chu Kum 4 atan ni se, Kum 19 thlenga Academy course an zir chuan eizawn nana sports hmang Mizoram in a ngah leh zual ang, tiin a sawi a. Mizoram sawrkar in Sports Policy thar a neihah infrastructure piah lamah Sports Promotion ah nasa lehzualin tan a la dawn bawk a ni, tiin a sawi. 

He hun hi Pu Zothanmawia, Nodal Officer, Khelo India chuan a kaihruai a, Chef De Mission Pu C.Lalremsanga’n report a pe bawk a, Minister Pu Robert Romawia Royte chuan Medal dawng te hnenah hian lawmpuina thilpek a hlan vek bawk a ni.