Vawiin chawhnu khan Mizoram Youth Commission(MYC) chuan zirlai tithazual leh Thalai lehkhathiam exam-na hlawhtlingte,  chhawmdawl tlaka titha te hnenah tanpuina sumfai a hlan a. He hunah hian Khuallian Pu Tawnluia, Dy Chief Minister chuan MYC hmalak chhohdan tur inziahna, MYC Road Map & Action Plan a tlangzarh nghal bawk a ni.

Khuallian Pu Tawnluia, Dy.Chief Minister chuan tun sawkarah thalaite chawikanna, tihhmasawnna leh an mahni kutkawiha eizawnna an hmuh theihna turin kawng tam takah hma lak mek a ni a ti a. Zirna lam bakah Infiamna khawvel huangah te pawh tan lak zual zel a ni dawn  a ni a ti. State Games hlawhtling tak leh hlawk thlak taka kan buatsaih atang khan thalaite tana sawrkar inpekna a chiang hle a ni a ti a. Lehkhathiam tanpui tlak te umzui zel an ni dawn a; chutiang bawkin sports huangah pawh incentive Cash kan buatsaih zel dawn a ni a ti.

Mizo thalaite nundan phung inthlak danglam ta chu tunlai khawvelin a ken tel leh hriatthiam ngai a ni tih sawiin  Mizo thalaite chu khawvel huapah pawh an hlawhtling chho tan a, an chhuanawm hle a ni a tih a sawi a. Thalaite chher hlawhtling tur chuan an rilruah tumruh leh taimakna te tuhsak a pawimawh tih  sawrkarin a hriat chian thu a sawia . Thalaite cho phur leh an theihna te phawk chhuak turin hma kan la mek zel  a ni ti. India ram pum huapah eizawnna kawng hrang hrangah inelna tam tak a awm a; hengah te hian kan Mizo thalaite an hlawhtlin theihna turin MYC kaltlangin kan sawrkar chuan Policy mumal tak a siam ta a. Hei hian sum lama harsatna nei, thalai thluak tha tak tak te tan pawh vanneihna a rawn hawng dawn a; hun reilote chhungin rah duhawm tak a chhuah ngei ka ring a ni a ti. Dy CM Tawnluia chuan vawiina Sawrkar tanpuina sum dawngtute chu a lawmpui thu sawiin an hlawhtlinna atanga hlawhtlinna lian zawk an neih theihna tura nasa zawka tan la chhunzawm turin a sawm a. All India Service, Medical, Technical, Central Civil Services, Defence leh a dang huangah te Mizo thalai tam zawk an luh theihna turin theihtawp sawrkarina chhuah chhunzawm dawn a.  Nakum lamah chuan Incentive Cash Award sangber Rs 2,00,000/- dawng thei turin thalaiten IAS(Main) Exam-ah inziak tling ngei turin chona an hmachhawn a ngai a ni a ti. 

MYC buatsaih, SEDP Incentive Cash Award programme chungchang sawihawngtu Dr. Vanlaltanpuia, MLA, Chairman, MYC chuan Chief Minister thahnem ngaihna avanga SEDP hnuaiah thalai lehkhathiamte chhawmdawlna tur sum ruahman a ni chu thalaite tan thil lawmawm tak a ni a ti a. Sawrkar hmalaknain MYC hnuaiah UPSC, IIT(JEE), NEET, CAT, Staff Selection Commission, Banking, IELTS leh hna thenkhat exam inpuachah nan Coaching kalpui mek a ni tih a sawi a. Lehkha zirsanglo tana hna tha tak Sipai a luh awlsamna turin Army Pre-Recruitment Coaching pawh kalpui thin a ni a ti. MYC Chairman chuan kum 2014 atang khan Mizo zingah IAS inziaktling an awm leh ta lo a. Hei hi sawrkarin a vei hle a. Nasa zawka nawr tumin hunreiloteah hian Delhi khawpuia Coaching Centre tha ber berah Mizo thalaite kan inzirtir dawn a ni a ti. MYC Office building tur hmunhma pawh sawrkarin MINECO-ah a enfiah tawh a, hun reiloteah Rs 8 Crore sengin  MYC Office Building sak a ni dawn a.MYC Office pahnih dang,  Lungleiah Rs 4 Crore man leh Serchhipah Rs 3 Crore sengin sak a ni leh bawk dawn a ni a ti. 

SEDP Incentive Cash Award thenhran zingah hian Category -II, III, IV leh V bakah Special Assistance Award te semchhuah a ni a. Category-II  award hian Rs 1,00,000 a keng a, Category-III hian Rs 50,000 a keng tela, Category _IV in Rs 40,000, Category - V in Rs 30,000 leh Special Assistance in Rs 50,000 a keng tel bawk a ni.  Rs 2,00, 000 hawn thei tur IAS(Main) exam passed erawh an awm lo a.  A vaiin sumfai Rs 70 lakhs semchhuah a ni. SEDP Incentive Cash award dawngtute hi an vaiin mi 147 an ni a. Category-II-ah mi 12, Category III-ah mi 67, Category-IV-ah mi 65, Category -V-ah mi 2 leh Special Assistance dawngtu mi 1 an awm a ni.  Dy CM Tawnluia'n Category-II a sem a, Category -III hi mi 3 - Pu H.Biakzauva, MLA, Vice Chairman, Agriculture Development Board, Dr Z.R. Thiamsanga, Vice Chairman, Health & Family Welfare Board leh Pu Krishna Mohan Uppu, Special Secretary, LESDE &E ten an sem a. Prof. K.R.S. Sambasiva Rao, Vice Chancellor, MZU in Category - IV & V a sem a. Special Assistance Award chu Dr.Tawnenga, Principal, PUC in a semthung a. Dr.H.Lalthlangliana, Director, LESDE & E chuan lawmthu sawiin he hun hi a khar a ni.