Vawiin chawhma khan Champhai DC Conference Hall-ah hmeichhe naupangte puala ni ruat  ‘National Girl Child Day’ chu Bawrhsap Pu SL Naveen hova hman a ni.

He ni puala thusawitu  Pu Mark Lalthanliana, Addl DC chuan India ram sawrkarin hmeichhe naupangte chawisana an zahawmna vawnhim sak chu a ngaipawimawh em em a ni, a ti a. Sawrkar laipui hmalakna Beti Bachao Beti Padhao (BBBP) Campaign hmangin hmeichhe naupangte tan zirna leh hamthatna dang dangte chhawpchhuah  anih thu a tarlang a.  National Girl Child Day lawmna hmang hian mitinte’n kan thinlungah hmeichhe naupangte dinhmun chawikana ngaihsak hlutna tuh theuh kan tum tur a ni, a ti bawk. 

He hunah hian National Girl Child Day puala intiamkamna Pu Lalnunfela Chawngthu, SDO Sadar kaihhruaina a neih niin, hmeichhe naupangte  dinhmun chawikana  an zahawmna humhim tum theuh tura intiamkamna kalkhawmte’n an la a ni. 

National Girl Child Day hi Sawrkar laipuia  Ministry of Women and Child Development  ruahmannain   kum  2008 atang khan kum tin January Ni 24 ah hman thin a ni a.   Hmeichhe naupangte’n enhran bik tawk lova  rahbi duhawm zawk an lo neih theihna tura  hmalakna a ni a.  He ni hi hmeichhe naupangte’n Zirna tha, ei leh in tha, hriselna, dikna  leh  zahawmna humhimna leh an mamawh angte an neih theihna tura inzirtirna hun atan hman thin a ni.