Vawiin khan Assembly Conference Hall, Aizawl ah Society for Climate Resilient Agriculture in Mizoram (SCRAM) buatsaih in ‘Fostering Climate Resilient Upland Farming System In The North East (FOCUS)’ Project hawnna hun neih a ni a, Agriculture Minister Pu C Lalrinsanga chu Khuallian niin Dr ZR Thiamsanga, MLA, Pu Lalrinsanga Ralte, MLA, Pu Ramthanmawia, MLA leh Pu Lalnunmawia Chuaungo, Chief Secretary ten he hun hi an hmanpui a ni.

Agriculture Minister Pu C Lalrinsanga chuan FOCUS Project chu hawngin ,”Mizoten a Lo kan lo neih dan than Jhum Cultivation avang hian kan leilung a thlaite tan a chaw tha kan ti chereu nasa ta em em a, sik leh sa inthlak thleng dan danglam nasat tak avangin kan ram in ruah tui a dawn dan te danglam ta zelin kan tui hnar thenkhatte pawhin kang chang a nei ta fo mai a ni”, a ti a,” Mizote nun a bet nghet em em Jhum system of Cultivation ti bo chuang lova kan ram leilung hausakna bo tur veng chung si in loneitute tan a hlawk zawk a lo an siam theih nan turin FOCUS hi din a ni”’ a ti. Pu C Lalrinsanga chuan Internationa Fund for Agriculture Development (IFAD) kal tlanga FOCUS hnuaia thawk tur mithiam thahnem tak an lak tharte chu fuih in, Project hlawtlinna chu a thawktute in pekna leh thahnemngaihnaah a in nghah thui ber thu a sawi a,” Kan hna thar chhelh te hi hlawh lak nan ringawt a hmang lovin kan ram leh mizo mipui, a bik takin, loneitute tan a rawngbawltu thinlung pu chungin  hna tha tak a thawk turin ka ngen duh che u a ni,” a ti bawk.

FOCUS Project hawnna hunah hian Pu Lalnunmawia Chuaungo, Chief Secretary in kal khawmte lawmna thu a sawi a, Pi Meera Mishra, Country Coordinator IFAD leh Pu Zion Lalremruata, General Secretary, AMFU ten thu sawina hun hmangin Pu RK Nithanga, State Project Director in FOCUS din tan anih dan leh kalpui anih dan tur tar lanna hun a hmang bawk a ni.

IFAD hnuai ah hian FOCUS Project hi India ram chhungah Nagaland leh Mizoramah chiah kalpui a ni a, Project inbuatsaihna hi January 25th, 2018 khan tan niin January 25th, 2024 a zo fel hman tura ruahman a ni. FOCUS Project atan hian Cheng 539.272 Crore ruahman niin Champhai, Kolasib, Serchhip leh Mamit ah hma an la anga, Block 11, khaw 272, In 64500 leh mi 322500 huam thei tur a ruahman a ni bawk.