372/2025-2026

Aizawl, the 29^th April 2025: Vawiin chawhma khan RB Mc Cabe Hall, Aijal Club-ah National Symposium and Consultative Workshop on production of Wine from Grapes and Fruits in Mizoram neih a ni a. Agriculture Minister Pu PC Vanlalruata chuan he hun hi Khuallian niin a hmanpui a. Technical session hnuhnung zawk hi  Dr  KC Lalmalsawmzauva, Adviser to Chief Minister hovin “ Building Sustainable Wine Industry in Mizoram Policy Initiatives and Recommendation” tih thupui hmanga neih a ni. 

Grape leh theirah thenkhat atanga Uaiin siam leh a kaihhnawih sumdawnna chungchang sawihona hi Mizoram Science, Technology & Innovation Council (MISTIC), Directorate of Science & Technology leh All India Wine Production Association (AIWPA) tangkawpin a buatsaih a ni a. He hunah hian Champhai leh Hnahlan Grape Grower Society member te bakah Horticulture Department official te, Agriculture Department official te, Science & Technology mi thiam te, Food & Drug Administration, H&FW official te, MISTIC  a scientist te, Commerce and Industries official te, Food & Drug Administration official te, Tourism Department official te, India ram hmun hrang hranga Grape Growers, Wine Producer te, Wine enthusiast te leh sumdawng te an tel a ni.

Agriculture Minister Pu PC Vanlalruata chuan Mizoramah theirah tam tak Uaiin a siam theih leh man man zawka sawngbawl theih, theirah tam tak kan nei tih a sawi a. Sawrkarin kuthnathawktu te’n an thlai thar te atanga sum tam zawk an hmuh theih dan tur leh state sum thawhchhuah tihpunna tur kawng hrang hrang a ngaihtuah a. Zu Khapburna dan kuminah ennawn a nih hnuiin Uaiin siamna lamah te pawh awmze nei zawkin hmalak tan a lo ni ta a. Wine sector-ah hma kan sawnna turin sawrkar angin Agriculture leh Horticulture te chuan kuthnathawktute tanpui turin a in hawng tih a sawi. He hmalakna huangah National Symposium hial buatsaih a lo ni ta chu lawmawm a tih thu sawiin he zirhona atangin hian Mizoram wine Sector chuan hlawkna a neih ngei a beisei tih a sawi bawk.

Pu Samuel Lalmalsawma, Principal Scientific Officer, MISTIC chuan inlawmna thu sawiin inaugural program hi tan a ni a. He hunah hian Pi Ramdinliani, Secretary, Horticulture, Pu H.Lalsawmliana, Chief Scientific Officer, MISTIC, Pu Francis Sailo, Coordinator for NE Region, AIWPA leh state pawnlam atanga Symposium rawn chhimtuten thu an sawi a. Hawnna program neih zawhah National Symposium and Consultative Workshop on production of Wine hi neih tan a ni a. Technical session pahnih ah then niin he hunah hian mithiam sawm bik ten zirtirna an pe a, sawihona hun pawh neih nghal zel a ni.