373/2025-2026
Champhai, 29th April 2025: Vawiin khan Champhai District Task Force on Immunization chu DC Conference Hall, Keifangtlangah Addl DC Pu K. Zorammuana hovin an ṭhukhawm a. Champhai District chhunga hri danna kalpui dan te thlirho niin, hmalak zel dan tur te sawiho a ni.
He hunah hian Dr. PC Lalhminglianq, Sr. CMO chuan Immunization kalpui dan sawifiahin, Immunization chuan damdawi thlauhthlak lam a kawk lova, natna ven lawk kawnga hmalakna pawimawh tak a ni zawk, a ti a. Hri danna hmangin zawng hri (small pox), zeng hri (polio) leh natna dang tam tak um bo tawh leh um bo mek zel anih thu sawiin, sakhuana leh hriatthiam tawk lohna avanga la duh lo te pawhin la vek se a duhsak thu a sawi bawk a ni.
Dr. Biakthansangi, Paediatrician, Champhai District Hospital chuan naupangte hnena hri danna pek pawimawhna a sawifiah a. Naupang hriselna chuan chhungkaw khawsakna sum leh pai thlenga a nghawng avangin, hri danna pek ngaipawimawh deuh deuh a ṭul tih a sawi a. Sawrkar hmalaknain mi pakhat tan hri danna (vaccine) cheng ₹ 80,000 man zet a thlawna pek chhuah mek anih thu leh hmeichhe tleirawlte tan chhul cancer venna vaccine (Human Papillomavirus) pek chhuah tuma hmalak mek a ni tih tarlang bawk a ni.
He hunah hian Champhai District chhunga hri danna pek chhuah kawnga harsatna hrang hrang leh chinfel dan tur te thlirho a ni bawk.
