Nimin khan Agriculture Minister Pu H. Liansailova chuan loneitute hman atan khawl chi hrang 3 – Mini Rice Mill (Buh Deng Khawl), Oil Expeller (Hriak Sawrna Khawl) leh Seed Processing Unit (Thlai Chi Sawngbawlna Khawl) te chu KVK, Lengpui-ah a hawng. Buh deng khawl hian darkar khatah buh quintal 5 – 7 a her thei a, Hriak sawrna khawl hian darkar khatah quintal 40 – 50 a her thei. Thlai chi sawngbawlna khawl hian darkar khatah buh quintal 10 a chi atan a sawngbawl fai hman a ni.

Pu H. Liansailova chuan thu sawiin Agriculture lama hmasawnna kal zelah loneitute thlai thar chhuah awlsam zawka sawngbawlna ngaihtuahsak an ni chu lawmawm a tih thu a sawi a, hengte hian kuthnathawktute tan phurna nasa tak a siam sak ngei a beisei thu leh heng khawlte hi tangkai taka hman a nih ngei a beisei thu a sawi. Tun hnaia India Today chanchinbuin Mizoram chu State te naute zinga Agriculture lama hmasawn chak ber State-ah a puang chu lawmawm a tih rualin hei hi Agriculture lama hnathawktu zawng zawngte thawh rah a ni a, hei hian hun lo kal leh zel turah nasa lehzuala tan laktirna hmanrua a nih ngei a beisei thu a sawi bawk.

Minister chuan NLUP chungchang pawh sawi langin loneituten eizawnna ngelnghet leh kumhlun an neih theihna turin NLUP hnuaiah nasa taka hmalak mek a ni a ti a, Mizoramin kan buhfai mamawh za zela 25 chauh kan thar chhuak thei chu tipung turin Buh thar tam kum puan a ni a, hei hian nasa takin buh thar a tihpun ngei a beisei thu a sawi bawk.

Khawl hawnna inkhawm hi Dr. O.P. Singh, Director of Agriculture (Research & Education) in a kaihhruai.