1336/2023-2025 

Aizawl the 2^nd August, 2023 : Pu C. Lalrinsanga Minister, Agriculture, etc chuan tukin khan Millenium Centre, Courtyard atangin Lakhuihthei Quintal 5 (500 kg) Tuichangral Organic FPC te tharchhuah chu Josie’s Kitchen, North East Cuisines, Mumbai lama hralh turin a vai liam.

Minister chuan thu sawiin, Vawiina kan lakhuihthei vailiam tur hi Central Sector Scheme, MOVCD- NER hnuaia Farmer Producer Company (FPC), Tuichangral Organic Farmer Producer Company Ltd., Khawzawl district te thar chhuah a ni a. Anni hi MOVCD-NER Phase III hnuaia FPC inziaklut niin, member 500 an ni. An FPC hian lakhuihthei hi thlai thlan bika neiin nikum chhung khan Metric ton 30 dawn an thar chhuak a. An FPC hian Khawzawl district chhunga lakhuihthei ching khaw hrang hrang pariat – Tlangpui, Tlangmawi, Lungtan, Sialhawk, Khawhai, Chalrang, New Chalrang leh Vangtlang te a huam a ni, a ti.             

State Lead Agency – Mission Organic Mizoram leh MOVCD – NER Scheme hnuaia Service Provider ni lai, Clover Organic Pvt. Ltd te tangkawp hmalakna in, nikum September thla khan Sonipat, Haryana lamah Tuichangral FPC tharchhuah lakhuihthei metric tonne 18 lai kan lo vailiam tawh bawk a. Nikum August thla khan Milennium Centre kawtzawlah vek hian lakhuihthei zawrhchhuah runpui hlawhtling taka buatsaih a lo ni tawh bawk a, Tuichangral FPC te hian nikum September thla vek khan Ministry of Agriculture and Farmer’s Welfare atangin FPC thawk tha award an lo dawng tawh nghe nghe a, State Lead Agency – MOM leh Service Provider – Clover Organic Pvt. Ltd te kaihhruaina hnuaiah Tuichangral FPC hian nasa takin hma a la zel a. Tun kum April ni 28 khan Konkuwan Herbs Pvt. Ltd. te nen in sumdawn tawnna na tur (contract farming) agreement an lo sign tawh bawk a. He an inremsiamna kaltlang hian ‘anchiri’ (Sugandhmantri) market tha tak sawh ngheh tum a ni. 

Tun tumah hian market zawnna atan lakhuihthei sample quintal 5 Mumbai lamah kan vailiam leh dawn a ni a. Beisei anga a kal anih chuan market nghet kan hmuh theih phah ngei kan ring bawk a ni. Khawzawl tlangdung lam lakhuihthei hi a tlangpuiin ‘Giant Kew’ variety an ni a, an thlum tui em em bakah tun tuma kan vailiam tur phei hi chu ‘organic’ lakhuithei ngat an nihna hian an hlutna a belhchhah hle a ni, a ti.

Tuichangral Organic Farmer Producer Company Ltd. te hian an FPC hmsasawn zel nan food – processing lam an bawhzui chho mek bawk a. Tun dinhmunah hian an FPC kutchhuak – lakhuihthei tui, lakhuihthei jam leh lakhuihthei squash te buaipui chhoh mek niin, reilotea zawrh chhuah theih tura hma lak mek a ni bawk a, an product zawng zawng hi ‘organic’ an nih vek bawk avangin Mizoram tana hmasawnna rahbi pawimawh tak a ni. 

Flag Off programme hi Pu James Lalsiamliana, Mission Director, MOM (MOVCD-NER) Agriculture Department chuan a kaihruai a, Tuichangral Organic FPC te hian July ni 26,2023 atanga August thla chhung hian Pineapple Bonanza – Millenium Centre Court Yard ah mipuite lei theih turin an chhawpchhuak mek a ni.