Vawiin khan Pu C. Lalrinsanga Minister i/c Agriculture, Irrigation leh Cooperation Department chuan Lungleia a Department chante Office tlawhin thawktute hmalakna leh harsatna te a sawipui. 

Lunglei a Cooperation Department Office a tlawhnaah Pu Lalnuntluanga ARCS leh a thawhpui ten lo dawngsawngin thawktute nen inkawn hona an nei nghal a, Minister chuan thu sawiin Sawrkarin hmasawnna tur hmachhawp hrang hrang a siamah Cooperation Department hi themtleng te zawk  ang maia pawimawh kan ni a , Cooperative Society Movement hmanga hmasawnna rahbi zawh hi Chief Minister duh Dan pawh a ni a ti a. Hma sawn tur chuan Society tha leh fel kan duan a ngai a, chumi atang chuan hmasawnna kalpui a ni ang a, thawktute pawh inpekna thuk zawk nen kan intuai thara tan kan lak a ngai hle a ni a ti bawk.

Minister hian Irrigation & Water Resources Office Lunglei tlawhin Pi Laldinpuii EE Irrigation & Water Resources Lunglei leh a thawhpui ten an lo dawngsawng a, Pi Laldinpuii chuan Irrigation Department hmalakna leh hmachhawp hrang hrang sawiin tun dinhmunah thawktu 31 an awm mek thu te a sawi a ni. Pu C. Lalrinsanga Minister chuan Lunglei Division in Lawngtlai leh Saiha te an kaihkawp avanga an hna a tam bik dan leh thawktu an indaih lohnate a hriatpui thu sawiin a theih ang chen chen a thawktu lak belh pawh a tul dawn thu a sawi a ni. Minister chuan Sawrkar hmalakna lian ber pawl Buhfaia intodelhna kawngah pawh Irrigation Department chu an tel lova hmalak theih a ni lo tiin Department pawimawh tak a nih anga thawktute pawhin theihtawp an chhuah a pawimawh thu a sawi bawk a ni.

Minister hian District Agriculture Office tlawh lehin thawktute nen Agriculture Rest house Lunglei ah inkawm hona hun an hmang leh a, he hun hi Lunglei DAO Pu Tlangtimawia Zote in a kaihruai a ni. Pu Ngurrinsanga Sailo, SDAO Lunglei chuan an Office Building leh thawktute Quarter thawm that a ngaih tawh dan leh a dinhmun tlangpui a sawi a, Dr. David Fangzauva AEO Hqrs. Lunglei pawhin ruahtui tla nasa leh tuilianin Lunglei District chhunga loneitute thlai leh leilet a tihchhiat dante Power Point Presenttation hmangin a sawifiah a ni. Pu C. Lalrinsanga Minister pawhin sik leh sa inthlak danglam nasa avanga thlai hrang hrang  thatna hmun leh hunte danglam hret hret chu thiamna ril zawk nen zir chiang a, a mil tur thlai ngaihtuah that zel a pawimawh thu a sawi a, Agriculture Department-a thawktute chu Department dang ang lo takin mi chi hrang hrang, mi harsa leh mawlmang zawkte dawr thin an nih avangin hmel hlim leh rilru inhawng taka anmahni dawrtute dawngsawng thin turin a chah bawk a ni.