Ruah sur nasa avanga Lunglei District chhunga chhiatna thleng chung changa Sawrkar Department-te hmalakna Pu C. Lalrinsanga Minister i/c Agriculture, Irrigation leh Cooperation Department hovin Lungleia Department hrang hrang aiawh ten thlir letna leh inhmakhua dan tur nimin khan an sawi ho. He hun DC's Conference Hall Lungleia neih hi Pu David Liansanglura, Additional DC Lungleiin a kaihruai a, Lunglei District chhunga chhiatna thlen dan report pe nghalin tuilianin a tihbuai leh chhiatna a thlen khaw 33 awmin lei tla hniam khaw 6 ah leh leimin hmun 21 ah a awm thu a sawi a ni.

Minister Pu C. Lalrinsanga chuan chhiatna thlengin a kaihhnawih Department hrang hrang ten theihtawp an chhuah avanga harsatna thlengte, ziaawm zawka mipuiin an tawrh theih phah chu lawmawm a tih thu a sawi a, khuarel chhiatna chu hun bi nei lova eng hun pawha thleng thei a nih angin hmachhawn tura ruahmanna tha engtik lai pawha neih a tul thu a sawi a ni. Chhiatna thenkhat kan tawh chhan zingah ram kan vat chereu nasa chu a chhan lian tak pakhat nia a hriat thu sawiin khawpui chhungah pawh tui luankawr mumal zawk leh tha zawk nei tura hma lak mek a nih thu Minister chuan a sawi lang bawk a ni.

Meetingah hian khuarel chhiatna chung changa a kaihhnawih Department hrang hrang ten an hmalak dan leh chhiatna thlen leh thulha an mamawh leh an harsatna an sawi a. 2nd MAP te chuan chhiatna a thlena chhuak mai thei tur sipai inring sa an neih thu leh an hmanrawneih ang ang te sawiin duh anga hmarua an neih kim loh thu leh pekchhuah mai theih tura awm tawh hmanraw thenkhat an hmuh loh thu an report a, Minister hian hemi chung changa thuneitute be nghalin a rang thei ang bera ngaihtuah nghal turin a hriattir a ni. 

Ei bar chung changah furpui thlen hmaa buhfai dah khawl ngaih zualna khaw 6 ah te buhfai dah khawl hman vek a nih thu sawi lan niin heng khua leh a chheh vel te tan kumin October leh November thla chhung tla tur buhfai chhek khawl a nih tawh thu leh Godown thenkhat te erawh hlui tawh tak tak thawm that ngai engemaw zat a awm tawh thu ngaihthlak a ni.  Leimin leh leikhi avangin hmun thenkhatah tui lakna Pipe chhia awm te chu an siamtha vek tawh tih PHE Department lam chuan sawiin khawpui tui pump chhuahna khawl chu engtik hunah pawh chhe ve thei a nih avangin ruah tui dahkhawl uar tura inzirtir a pawimawh thu sawi lan a ni bawk. 

Kawng min leh lei tawlh  avanga kawngpui hnawh pin hmun tamtaka awm te chu tih fai vek tawh a nih thu PWD ten sawiin tun dinhmunah chuan District chhung hmun hrang hrangah kawng a tlang that thu an sawi lang a. Power chung changah hmun thenkhata Transformer tekin a den chhiat leh bantlu te hriat theih chinah siam that vek a nih thu thawktute chuan an sawi lang bawk a, Melriat - Khawiva Alternative Line hmalakna chung changa Minister zawhna chhangin Power & Electricity Department Lunglei SE chuan ruahmanna a tel lo hmunhma harsatna avanga ban 11 zet phun belh ngai avanga la zawh theih loh a nih thu a sawi a, heng ban phun belh turte hi lak khawm mek niin kumin December thla chung chuan hman theih tura zawh hman an in beisei thu a sawi bawk a ni. 

Pu Rajneesh Gupta DIG Southern Range pawhin ruahtui dah khawl pawimawhna leh tui hawk kawngboin leilung a tihchhiat dan a sawi lang a, Meetingah hian Lunglei SP Pu C. Lalthanmawia, Pu Lalnundika SDO (Sadar) leh Department hrang hrang aiawh mipawimawhte bakah Lungleia Chanchinbu mite an tel a ni.