Central YMA hnuaia Supply Reduction Service batch 9-na ten thla thum chhung (3.4.2019 - 20.7.2019) a ruihhlo an man, cheng nuai 25.02 hu chu tukin khan CYMA office kawtah Chief Minister Pu Zoramthanga chuan a halral. Ruihhlo halral pual hian infuihna hun hman nghal niin Home Minister Pu Lalchamliana leh Excise & Narcotics Department Minister Dr. K. Beichhua te an tel bawk.

Chief Minister chuan ruihhlo do hna chu hautak viau mahse chhungkua leh khawtlang humhimna, kan fa te nun chhanhimna a nih avangin tang taka kan chhunzawm tlan a ngai a ni, a ti. CYMA ten an ruihhlo man halralna leh tan la tura inhrilhna hun an siam chu lawmawm a ti a. Ruihhlo do chu Mizoram mai nilo khawvel pumin a buaipui thu leh nunna hlu tam tak suattu a nih avanga sum siamna atana ruihhlo hmangtute chu tih tak zeta do an ngaih thu a sawi a. Chief Minister chuan ruihhlo lo kalna dang tura khawchhak lam ram hruaitute nen pawh inbiak a tul thu te, ruihhlo laluttute leh ram chhunga lo thehdarhtute tireh tura hnathawkte theihtawpa thuam chak a, ruihhlo vanga buai leh harsatna tawkte enkawl dam tura hmun lian leh tha tak, facility mamawh hrang hrang dahna hmun siam te chu hmalakna tur pawimawh hrang hrang a nih thu sawiin, Sethawn a sawkarin ruihhlo ngai enkawlna hmun pui siam a tum thu te a tarlang a. Mizote chu "regimented society", zirtir a kaihhruai nuam tak kan nih avangin ruihhlo do kawngah pawh hian kan tan ho tlat chuan thui tak kan kal thei dawn a ni, a ti.

Home Minister Pu Lalchamliana chuan thla thum chhung chauh a SRS in cheng nuai 25 chuang ruihhlo an man chuan an thawhrimzia a lantir a ni, a ti a. Chutihruala tha leh zung bakah pawisa senso tam tak a awm tih a hriat tel thu a sawi. Home Minister chuan ruihhlo do tura SRS din chu sawrkarin tha a tih thu leh chhunzawm zel a nih tur thu a sawi a. Ruihhlo hian kan ram hi min run nasa takzet a, a tawlhtute hian an bei nasa tih a chiang a, chuvang chuan a dotute pawh tha thlah thei kan nilo a ni, tiin kalkhawmte chu inlungrual taka thawk zel turin a sawm a ni.

Excise and Narcotics Minister Dr. K. Beichhua chuan SRS hmalakna chuan ruihhlo dona ah zoram hmathlir a ti eng a ni,a ti a. Excise department chu thawktu tlemte nei a nih avangin YMA leh police te nen thawhhona tha a nei thei chu lawmawm a tih thu sawiin Zoram a dam theih nan lungrual takin a aia chak zawka thawhpuiah kalkhawmte a sawm a ni.

Vawiin programme hi Pu Lalhmachhuana, CYMA General Secretary chuan kaihruaiin President Pu Vanlalruata chuan thu sawi bawkin, ruihhlo kaihhnawiha man mi 852 zinga mi 610 chu counselling pek tel an nih thu te a sawi. Vawiin atang hian SRS batch 10-na ten hna an tan leh dawn chiah a ni. SRS 9th Batch a sum hman ral zawng zawng hi Rs. 6,19,000 a ni.

Ni 3.4.2019 atanga 20.7.2019 chhung khan SRS ruihhlo man zat hi a vaiin Rs. 82,17,625 man hu a ni a. Heng zingah hian Heroin hawng 122, can 660, chhinsen 179 leh bagha cap 865 te, Trama + AP strip 15,726 te, Ganja gram 15.47 leh khuh damdawi bottle 499 a tel a ni. Heng thil mante hi Police ah leh excise a hlanchhawng engemawzah a awm a. SRS kut a kawl ganja kg 2 leh heroin (hawng 33, can 328, chhinsen 158 leh bagha cap 728) te, a vai pawisa hlutzawng Rs. 25,02,000 chu Chief Minister ho hian halral a ni.